Axudas directas de 400 euros a comercios, hostaleiros e autónomos de Ponte Caldelas
Por Redacción
Ponte Caldelas concederá axudas directas aos autónomos do municipio que tiveron que pechar os seus negocios ou que viron reducidos os seus ingresos debido ao estado de alarma decretado pola crise sanitaria do coronavirus.
O Concello destinará 45.000 euros a estas axudas excepcionais que se poñen en marcha para axudar aos negocios locais. Son dúas liñas de axudas directas, que se repartirán ata esgotar crédito, e que se entregarán baixo concorrencia non competitiva.
Ningún autónomo que o solicite e que cumpra os requisitos quedará sen axuda porque, segundo o alcalde, Andrés Díaz, "non imos deixar a ninguén tirado".
Haberá unhas axudas de 400 euros para os establecementos pechados e de 200 euros para actividades produtivas e establecementos cun peche parcial da actividade.
Díaz entende que este é un momento "circunstancial" que supón unha "paréntese" na vida das persoas, a nivel persoal e tamén laboral "e por iso é importante axudar para que os negocios sobrevivan a este parón e manteñan os postos de traballo".
Estas axudas directas son destinadas ao mantemento do tecido empresarial, comercial, de restauración e hostalería de proximidade, co obxectivo de mitigar os efectos económicos negativos que se poden producir en determinados sectores da economía municipal.
As axudas pagaranse por transferencia bancaria cun pago único. O Concello recomenda a todos os interesados na convocatoria que se poñan en contacto telefónico coas súas xestorías, que poderán facer o trámite a través da sede electrónica municipal sen necesidade de ter que saír da casa para conseguir ningún documento dos que se solicita na convocatoria.
Relacionadas:
-
Ponte Caldelas anuncia que este será o ano con máis investimentos da súa historia
Por Redacción |
-
Comeza "DegustaNaCasa", a campaña de apoio á hostalería local de Ponte Caldelas
Por Redacción |
-
Ponte Caldelas comeza o pago de axudas municipais a autónomos e pemes
Por Redacción |
-
Avalancha de peticións dos concellos ás axudas extraordinarias da Deputación pola crise sanitaria
Por Redacción |
-
O Concello de Ponte Caldelas dará axudas directas a comercios, hostaleiros e autónomos
Por Redacción |