Marín coordina o voluntariado para confeccionar mascarillas de cara ao inicio da desescalada
Por Oskar Viéitez
O pobo de Marín leva mostrando a súa enorme solidariedade desde o minuto un da crise sanitaria polo Covid-19. Unha solidariedade que se viu traducida en doazóns de toda clase, pero especialmente de material de prevención para aquelas persoas que teñen que estar na primeira liña e ás que a cidadanía marinense quere "agradecer a súa dedicación, vocación e sacrificio".
Coas novas recomendacións das autoridades estatais e sanitarias relativas á utilización de mascarillas, foron moitas as persoas que ofreceron ao Concello de Marín a súa dispoñibilidade para confeccionar estas unidades, co obxectivo de que cheguen ao maior número de xente posible.
Ante esta situación e coa finalidade de coordinar toda a axuda, o Goberno local ven de anunciar unha campaña de voluntariado para poder englobar a todas esas persoas dispostas a botar unha man na confección de mascarillas e para poder organizar a novas persoas voluntarias que poidan xurdir nos próximos días.
Segundo explicaron fontes municipais este martes, "o Concello encargarase de dotar a todas estas persoas do material necesario para a confección das mascarillas: tela, gomas, fío... e unhas instrucións básicas para elaborar as unidades".
Este material será levado ata os domicilios dos participantes na campaña, do mesmo xeito que serán recollidas as mascarillas que con el elaboren. "Farémolo así porque consideramos que é a maneira máis segura, evitando que se teñan que realizar desprazamentos".
Unha vez que o Concello conte coas mascarillas, serán esterilizadas seguindo todos os procesos de hixiene e de prevención recomendados polas autoridades sanitarias, e empaquetadas, para finalmente proceder ao seu reparto.
O obxectivo é que estas unidades sirvan para "ese momento de desescalada", afirmaron, cando pouco a pouco a cidadanía vaia volvendo, de maneira transitoria, á vida normal, pero mantendo unha serie de medidas de prevención, entre as que estará portar as mascarillas.
Relacionadas:
-
Unha pontevedresa confecciona un cento de máscaras para a Garda Civil
Por Redacción |
-
O Concello de Marín reactiva as obras de humanización en Concepción Arenal
Por Redacción |
-
A Policía Nacional reparte máscaras a usuarios do transporte público en Marín
Por Redacción |
-
Os xestos altruístas chegan a Marín en forma de limpezas e material de protección
Por Redacción & Diego Torrado |