Descenden os hospitalizados por coronavirus na área sanitaria e tramitan altas a 13 pacientes
Por Natalia Puga
A área sanitaria de Pontevedra e O Salnés rexistrou nas últimas 24 horas un descenso do número de pacientes con positivo en coronavirus que se nota especialmente nos hospitais, pois este xoves 16 de abril hai 12 menos que o mércores e, na última xornada, prescribiuse o alta a un total de 13 persoas.
Segundo o balance oficial realizado polo Servizo Galego de Saúde, este xoves hai 40 persoas hospitalizadas na área sanitaria, fronte aos 52 do mércores. O número de pacientes que evolucionan en UCI mantense igual, 11, pero descenderon os que están en planta nalgún dos hospitais.
En concreto, hai 29 hospitalizados en planta, 5 deles no Hospital do Salnés e o resto no Hospital Montecelo. 461 casos están en domicilio.
En total, hai 501 casos activos de coronavirus na área sanitaria, catro menos en total que un día antes. Tendo en cuenta que 13 pacientes están recuperados e tramitóuselles o alta, en realidade, rexistráronse 9 positivos máis nun día.
Desde o inicio do plan de continxencia do COVID-19 faleceron nesta área sanitaria 12 pacientes e prescribíronse 136 altas hospitalarias -13 tramitadas neste último día-.
A nivel autonómico, segundo a última actualización da Dirección Xeral de Saúde Pública da Consellería de Sanidade, o número de casos activos de coronavirus ascende a 6.085, deles 1.332 son da área da Coruña, 592 da de Lugo, 1.203 da de Ourense, 501 da de Pontevedra, 1.089 da área de Vigo, 1.025 da de Santiago, e 343 da de Ferrol.
Do total de pacientes positivos en Galicia, 123 permanecen en UCI, 678 están en unidades de hospitalización e 5.284 no domicilio. Polo de agora, en Galicia rexistráronse 1.383 altas de pacientes e 405 falecementos.
O número de PCR realizadas é de 53.829 e o número de casos de coronavirus detectados en centros residenciais de servizos sociais de Galicia supoñen o 3,9% do total das persoas residentes. En total, hai 956 usuarios e 422 traballadores de centros residenciais con positivo en coronavirus e rexistráronse 95 mortes en residencias e 86 en hospitais e residencias integradas.
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.
Relacionadas:
-
Mesmo número de afectados por coronavirus que o sábado, con 507 casos activos na área sanitaria
Por Diego Espiño |
-
Estabilidade nos datos de coronavirus na área sanitaria: 507 casos activos e 35 persoas hospitalizadas
Por Diego Espiño |
-
Lixeiro aumento de positivos e novo descenso de hospitalizacións por coronavirus na área sanitaria
Por Natalia Puga |
-
Sanidade confirma o contaxio por coronavirus de 75 sanitarios, dos que 22 se recuperaron
Por Natalia Puga |
-
Menos hospitalizados, un paciente menos na UCI e só un caso activo máis de coronavirus na área sanitaria
Por Diego Espiño |