Estabilidade nos datos de coronavirus na área sanitaria: 507 casos activos e 35 persoas hospitalizadas
Por Diego Espiño
A tendencia cara á estabilización de afectados polo Covid-19 na área sanitaria de Pontevedra e O Salnés nos últimos días segue manténdose a teor dos datos oficiais ofrecidos este sábado 18 de abril pola Consellería de Sanidade.
Segundo estas cifras, o número de casos activos por coronavirus na área sanitaria incrementáronse en dúas nas últimas 24 horas ata un total de 507, dous máis que a xornada anterior.
Pola súa banda as hospitalizacións redúcense a 35, unha menos que o venres, mesma redución que na Unidade de Coidados Intensivos (UCI) onde permanecen 10 das persoas ingresadas. O resto de hospitalizados repártense entre as plantas de atención ordinaria de Montecelo, O Salnés (1) e QuirónSalud Miguel Domínguez (1), mentres que 472 afectados atópanse nos seus domicilios.
Así mesmo tras o falecemento o venres dun home de 64 anos que se atopaba ingresado en Montecelo, a cifra de defuncións asociadas ao Covid-19 na área sanitaria ascendeu a 13.
En canto ás altas hospitalarias, prescribíronse 2 no último día para un total de 143 pacientes recuperados.
A nivel autonómico a Dirección Xeral de Saúde Pública da Consellería de Sanidade informa que, na última actualización, o número de casos activos de coronavirus en Galicia ascende a 6.147, dos que 1.382 son da área da Coruña, 594 da de Lugo, 1.200 da de Ourense, 1.089 da área de Vigo, 1.030 da de Santiago, e 345 da de Ferrol.
Do total de pacientes positivos, 115 permanecen en UCI, 598 están en unidades de hospitalización e 5.434 no domicilio. Polo de agora, en Galicia rexistráronse 1.507 altas de pacientes e 430 falecementos.
O número de PCR realizadas é de 60.258.
O número de casos de coronavirus detectados en centros residenciais de servizos sociais da comunidade supoñen o 4,1% do total das persoas residentes. Hai un total de 1.012 usuarios e 424 profesionais contaxiados e producíronse 96 falecementos en residencias e 88 en hospitais e residencias integradas. Na última xornada produciuse un único falecemento en centros residenciais, concretamente na residencia Sta. Teresa de Jornet (A Coruña).
A Consellería de Sanidade reitera que a cidadanía empregue o número 061 só para emerxencias ou casos graves e aconsella utilizar o número gratuíto do 900 400 116 para consultar dúbidas ou síntomas leves de coronavirus.
O Sergas ten ao dispor da cidadanía unha páxina web (https://coronavirus.sergas.es), na que se pode consultar información dirixida á poboación, aos profesionais sanitarios e a outros colectivos.
Relacionadas:
-
Mesmo número de afectados por coronavirus que o sábado, con 507 casos activos na área sanitaria
Por Diego Espiño |
-
A morte dun home de 89 anos en Montecelo eleva a 14 as vítimas do coronavirus
Por Oskar Viéitez |
-
A morte dun home de 64 anos eleva a trece os falecidos por coronavirus en Pontevedra
Por Alejandro Espiño |
-
Lixeiro aumento de positivos e novo descenso de hospitalizacións por coronavirus na área sanitaria
Por Natalia Puga |
-
Sanidade confirma o contaxio por coronavirus de 75 sanitarios, dos que 22 se recuperaron
Por Natalia Puga |
-
Descenden os hospitalizados por coronavirus na área sanitaria e tramitan altas a 13 pacientes
Por Natalia Puga |
-
Menos hospitalizados, un paciente menos na UCI e só un caso activo máis de coronavirus na área sanitaria
Por Diego Espiño |