Flores anónimas para agradecer o traballo da Garda Civil de Pontevedra
Por Redacción
Unha florista que non quixo identificarse fixo saltar as bágoas de emoción este venres aos axentes da Comandancia da Garda Civil de Pontevedra. Achegouse ata o punto de control das instalacións e deixou un ramo de flores coa seguinte nota: "En agradecimiento por la labor que estáis haciendo".
"Os lo merecéis. Gracias por estar siempre ahí", engade a nota, que non está asinada. A persoa que a entregou tampouco deixou ningún nome, senón que o entregou de forma anónima na Comandancia para dar as grazas polo papel da Garda Civil nestes días complicados da pandemia do coronavirus.
Desde a Comandancia quixeron dar as grazas á doante anónima. Dado que non puideron agradecer o seu xesto en persoa, fixérono a través dunha publicación na conta de Facebook da Garda Civil de Pontevedra, na que confesan que o xesto desta florista provocoulles bágoas e deixoulles "o corazón emocionado".
Ademais, fontes oficiais da Garda Civil quixeron agradecer publicamente este xesto "tan xeneroso" que aseguran que "sen dúbida, servirá de aliciente e estímulo para seguir sumando esforzos na loita contra a COVID-19".