Reclaman á Deputación axudas para protectoras e clínicas veterinarias
Por Redacción
A Fundación Franz Weber en Galicia lanza un chamamento cara á Deputación de Pontevedra para reclamar liñas de apoio para as entidades protectoras de animais e para a profesión veterinaria ao entender que están a sufrir dificultades económicas, a pesar de manterse en funcionamento durante o actual estado de alarma.
Neste sentido, a organización lembra que os refuxios e protectoras da provincia continúan rescatando animais e acolléndoos. Indica que estes colectivos sufriron un recorte de ingresos ao perder socios e donativos, ademais de atoparse coa imposibilidade de realizar actividades presenciais para recadar fondos.
Tamén indica que os profesionais veterinarios están a comprobar como as restricións derivadas do confinamento debilitan os seus ingresos, malia que o Real Decreto que establece o estado de alarma permite a apertura destas clínicas de atención animal.
Por este motivo, a Fundación pide unha liña de subvencións para que as protectoras poidan adquirir alimento, vacinas e funxibles veterinarios, ademais de solicitar avais e préstamos a interese cero para que as clínicas veterinarias afronten os custos sociolaborais.
Segundo sinalan, as axudas anunciadas pola Xunta de Galicia só se aplicarán a entidades que xestionen centros autorizados e, desta forma, exclúense ás asociacións que traballan con casas de acollida, unha fórmula que está recoñecida pola Lei de Benestar Animal. A Fundación Franz Weber apunta a que esta medida deixa fóra a preto do 80% das entidades que realizan este labor de axuda aos animais.
Relacionadas:
-
Non é unha invasión, os animais salvaxes xa estaban aquí
Por Manu Otero |
-
Recollidos 23 cans das rúas durante o estado de alarma
Por Oskar Viéitez |
-
'Peludiños solidarios', un evento para axudar tres asociacións protectoras dos animais
Por Redacción |
-
O Colexio de Veterinarios de Pontevedra reclama que lles baixen o IVE ao tipo reducido
Por Oskar Viéitez |