As máscaras serán obrigatorias no transporte público a partir do luns
Por Alejandro Espiño
Dentro da desescalada prevista para que o país vaia regresando á normalidade aos poucos, o Goberno anunciou novas medidas para flexibilizar a situación do estado de alarma. Unha delas afecta de cheo á protección directa da cidadáns fronte ao virus.
A partir do luns, todas as persoas que empreguen calquera tipo de transporte público, entre eles autobuses e trens, deberán usar máscara. Será algo obrigatorio, segundo explicou o presidente do executivo, Pedro Sánchez.
Esta medida adóptase a pedimento das autoridades, segundo Sánchez, ante o previsible aumento dos desprazamentos que se producirá nas diferentes fases deste proceso de desescalada e garantir así a distancia social entre os seus usuarios.
Para iso, engadiu, o Goberno prevé incrementar a distribución de máscaras, con ata dez millóns de unidades, para que sexan repartidas entre os principais centros de transporte, concellos e asociacións do ámbito social.
"Nesta desescalada será aínda máis importante o control e a responsabilidade social e persoal", explicou Pedro Sánchez, que entende que será "clave" neste proceso "non unha soa decisión persoal" senón as que adopten decenas de miles de cidadáns "no fogar, o transporte, o traballo ou o lecer".
O estado de alarma, defendeu Sánchez, "funcionou" para reducir o impacto do coronavirus na poboación pero, xunto con esta desescalada, entende que segue sendo "necesario" amplialo quince días máis, ata o 25 de maio.
Así o solicitará o vindeiro martes, anunciou, no Congreso dos Deputados.
Ademais, o presidente do Goberno avanzou que se poñerá en marcha un "fondo especial" para a reconstrución social que supoñerá unha inxección de 16.000 millóns de euros para distribuír entre as comunidades autónomas.
Será un fondo "non reembolsable" que se activará para que ningunha comunidade "quede atrás", dixo. Os detalles desta iniciativa coñeceranse mañá domingo tras a oitava conferencia de Sánchez cos presidentes rexionais.
Relacionadas:
-
"Máxima preocupación" en Galicia polo recorte nas frecuencias dos trens
Por Redacción |
-
A Subdelegación e a Deputación distribúen máis de 140.000 máscaras na provincia
Por Redacción |
-
Así foi o reparto de máscaras entre os usuarios de autobuses, trens e taxis
Por Oskar Viéitez & Diego Torrado |
-
O Goberno repartirá a partir do luns 289.500 máscaras para o seu uso no transporte público da provincia
Por Redacción |
-
As terrazas da hostalería poderán encherse ata a metade da súa capacidade
Por Alejandro Espiño |
-
Ata dez persoas poderán reunirse en casas particulares ou ao aire libre a partir do 11 de maio
Por Alejandro Espiño |
-
Os pontevedreses saen a respirar: madrugóns e distancias de seguridade no primeiro día de deporte e paseos
Por Diego Torrado & Redacción |
-
Establecen tres franxas horarias limitadas para pasear a partir deste sábado 2 de maio
Por Redacción |