A reforma da estrada entre Peso e Caroi comezará o martes
Por Redacción
En oito meses prevé a Deputación que estean rematadas as obras de mellora da seguridade viaria da estrada entre Peso e Caroi, nos concellos de A Lama e Cerdedo-Cotobade.
Estes traballos, que comezarán o próximo martes, teñen un orzamento que roza os 750.000 euros, segundo detalla o goberno provincial.
O tramo que se vai mellorar abrangue dous quilómetros da estrada EP-0307, entre o catro e o seis, que na actualidade presenta un firme deficiente e ten dobre sentido de circulación, pero sen delimitar os carrís e cun ancho total de entre 3 e 4 metros, sen beiravías nin bermas.
Trátase ademais dunha zona estreita debido a que o viario discorre a media ladeira e existen nas súas marxes grandes desniveis, edificacións e formacións rochosas.
A estrada, cuxo límite no leste é a Serra do Cando, catalogada na Rede Natura 2000, discorre por unha zona con alta pluviometría e habitualmente debe evacuar volumes importantes de auga, polo que estes traballos eran máis que necesarios.
As obras permitirán ampliar a superficie da estrada provincial para garantir á seguridade viaria e dotala de carrís de 2,75 metros, unha cuneta de seguridade dun metro de ancho na marxe dereita, beiravías de 0,5 metros e unha berma na marxe esquerda de 0,5 metros.
Para realizar esta actuación, será necesaria a construción de varios muros de sostemento de cachotaría de 2 a 3 metros de altura, así como o desmonte do noiro lateral da marxe dereita do viario.
Tamén será preciso o retranqueo dalgúns peches de parcelas e barreiras de protección, así como a substitución e/ou ampliación das obras de drenaxe existentes.
Ademais, con estas obras reporase a barreira de seguridade e colocaranse sinais verticais e horizontais e seis redutores de velocidade.
Relacionadas:
-
Satisfacción na Lama e Cerdedo-Cotobade tras a mellora da estrada entre Peso e Caroi
Por Redacción |
-
Avanzan as obras na estrada provincial Peso-Caroi ao seu paso pola Lama e Cerdedo-Cotobade
Por Redacción |
-
Preto dun millón de euros para mellorar unha precaria estrada provincial na Lama
Por Redacción |
-
Cerdedo-Cotobade e A Lama logran os terreos para ampliar a estrada entre Peso e Caroi
Por Redacción |
-
Uxío Benítez anuncia que están a redactar o proxecto de mellora para a estrada Peso-Caroi
Por Oskar Viéitez |