O estado de alarma non freou a nova residencia de Cerdedo, que estará terminada no outono
Por Redacción
O parón da actividade derivado do estado de alarma polo coronavirus non supuxo grandes cambios para un dos proxectos estrela do ano en Cerdedo-Cotobade. A pesar de que durante varias semanas as obras estiveron paradas, a construción da nova residencia da terceira idade de Cerdedo segue a bo ritmo e xa afronta a derradeira fase das obras, fixadas nun semestre. Mantén o obxectivo de que os traballos rematen no outono deste ano 2020.
O alcalde de Cerdedo-Cotobade, Jorge Cubela, interesouse polo estado das obras para coñecer as consecuencias da obrigatoria paralización da mesma pola crise sanitaria e desvelou que o cronograma previsto apunta á conclusión da obra física no mes de novembro.
Así, destacou o bo ritmo dos traballos malia o freo que sufriron polo Estado de Alarma e amosou a súa confianza en que o novo xeriátrico público estará en funcionamento ao longo do vindeiro ano 2021, xa que cómpre lembrar que tras a construción haberá que afrontar os procesos de contratación e subministro do equipamento e activar toda a operativa de persoal e loxística para a súa apertura.
En canto ás obras, tras o remate da estrutura xeral o pasado outono, comezaron diversas liñas de traballo que xa deron os seus froitos, xa que a cuberta xa está impermeabilizada e as tarefas de albanelería están a piques de rematarse. As instalacións de servizos tamén se atopan bastante avanzadas. En principio está previsto que o seguinte paso sexa a colocación da carpintaría exterior.
O novo xeriátrico público, impulsado polo Consorcio de Igualdade e Benestar da Xunta de Galicia, contará con 48 prazas e disporá a posibilidade de que o Concello reserve prazas para a atención aos veciños que a poidan precisar.
O proxecto supón un investimento integral da Xunta de Galicia de 1,7 millóns de euros. A futura residencia, que está a ser acometida pola empresa Ogmios Proyecto, disporá de 24 habitacións dobres en dúas plantas.
Relacionadas:
-
Jorge Cubela, alcalde de Cerdedo-Cotobade, acusa ao PSOE provincial de mentir sobre as residencias de maiores que promove a Xunta
Por Redacción |
-
As obras exteriores da nova residencia de Cerdedo terminarán en xullo
Por Redacción |
-
Os dermatólogos pasarán consulta por videoconferencia nas residencias de maiores
Por Redacción |
-
Reanudan as obras públicas en Cerdedo-Cotobade tras a suspensión polo estado de alarma
Por Redacción |
-
Paso adiante para a construción da Residencia da Terceira Idade en Carballedo
Por Redacción |