O Punto Limpo Móbil de Poio retomará o martes a súa actividade
Por Redacción
Logo do seu peche, provocado polo decreto do estado de alarma o pasado 14 de marzo, o Punto Limpo Móbil retomará a súa actividade a vindeira semana. En concreto, o dispositivo estará operativo a partir do martes 19 de maio, tal e como informa a tenente de alcalde, Chelo Besada.
"Recuperamos o horario e calendario habitual", sinala a edil responsable do departamento de Obras e Servizos Municipais. Polo tanto, entre o 19 e o 21 o depósito permanecerá instalado na avenida de Chancelas, na explanada situada á altura do acceso desde a PO-308 ao CEIP Chancelas e o cemiterio municipal. O servizo permanecerá activo entre as 9.00 e as 14.00 horas.
Besada explica que a reapertura do Punto Limpo Móbil pódese levar a cabo nesta fase 1 do proceso de desescalada, toda vez que durante as primeriras semanas de confinamento os desprazamentos para utilizar este dispositivo non figuraba entre os de primeira necesidade.
Ademais, a tenente de alcalde confirma que se tomarán as medidas hixiénicas e de distanciamento pertinentes. Deste xeito, o operario encargado de xestionar a instalación utilizará o material necesario de protección, incluídas máscara e guantes. Ademais, porase a disposición dos usuarios xel hidroalcólico.
Chelo Besada lembra que o Punto Limpo Móbil ten un carácter itinerante e instálase en diferentes emprazamentos cada semana. Deste xeito, a seguinte semana pasará a colocarse na Praza Alfredo Romay de Samieira (os días 26 e 27) e na Rúa Leopoldo Nóvoa de Raxó (28 e 29). De cara ao mes de xuño, permanecerá operativo en Lourido (San Salvador) entre o 2 e o 4 de xuño, mentres que na Seca estará aberto os días 9, 10 e 11.
Este servizo, de carácter gratuíto, está a disposición de toda a veciñanza de Poio e serve para depositar pequenas cantidades de residuos voluminosos e perigosos do fogar, garantindo o seu tratamento axeitado, mediante a posterior entrega a un xestor autorizado. A tenente de alcalde lembra que, ata a seu peche por mor do estado de alarma, o Punto Limpo Móbil estaba a ter unha gran acollida entre a veciñanza, sendo utilizado por preto de 120 usuarios. Case o 50% dos usuarios corresponden ao mes de febreiro, o único no que estivo operativo completando todo o calendario, xa que se puxo en marcha a mediados de xaneiro e e só funcionou durante a primeira quincena de marzo.
Entre os residuos depositados, inclúense sobre todo electrodomésticos, mobles, restos textís, madeiras, chatarra, vidro, plásticos e Residuos de Aparatos Eléctricos e Electrónicos (RAEE), que inclúen os seus materiais, compoñentes, consumibles e subconxuntos. Este servizo non contempla a xestión de lixo orgánico e residuos industriais, agrícolas, gandeiros ou farmacéuticos, así como restos de obra.