As directoras das residencias de maiores de Pontevedra permitirán as visitas de maneira progresiva a finais de maio
Por Anxo Lourido
As directoras das residencias da terceira idade de Pontevedra mantiñan un encontro na mañá deste 21 de maio no Concello de Pontevedra co alcalde, Miguel Anxo Fernández Lores, e coa concelleira Carmen Fouces neste momento de baixada da tensión que se mantivo durante estas últimas semanas debido á pandemia da COVID-19.
Pontevedra non rexistrou ningún caso de contaxio nin de falecemento pola enfermidade do coronavirus durante estes meses nestes centros de maiores, segundo manifestaban María Teresa Caneda Triñanes, directora-administradora da residencia de maiores de Campolongo; Rocío Pidre e Concha Ocampo, directora e doutora da residencia Soremay e Lucía Saborido, directora da residencia Saraiva este xoves.
Unha circunstancia que o alcalde de Pontevedra entende que non é unha casualidade e que manifestou que "ten moito que ver coa profesionalidade e con manter as medidas de seguridade e con estar en contacto coa xerencia da área sanitaria de Pontevedra desde o primeiro momento, para o intercambio de información e de impresións para tomar as mellores medidas posibles".
Desde o Concello de Pontevedra ofreceuse a máxima colaboración no coidado e traballo de limpeza e desinfección das zonas próximas aos centros de maiores, ademais de desenvolver unha labora de apoio en cuestións relacionadas coa seguridade.
Lores comprometeuse a que axentes da Policía Local ou integrantes de Protección Civil axudarán nas tarefas que permitan garantir as distancias de seguridade nos espazos públicos próximos ás residencias. Neste sentido, o alcalde fixo un chamamento á cidadanía para que teña en conta que as persoas maiores comezarán a saír das residencias, despois de dous meses e medio, e é necesario que teñan a estar persoas en consideración.
A residencia de maiores de Campolongo conta actualmente con 95 residentes e 98 traballadores; mentres que a de Soremay ten a 82 maiores e Saraiva, 38. As directoras dos tres centros agradeceron a colaboración por parte das familias ao minimizar o risco de contaxio e desde o primeiro día asumir que non podían realizar visitas.
María Teresa Caneda relataba que durante os primeiros días había unha sensación de medo e de incerteza xeral, pero o persoal do centro de Campolongo tivo unha actitude "extraordinaria". Sinalaba que moitos traballadores nin sequera acudían ao supermercado para facer a compra para evitar calquera posibilidade de contaxio cos maiores aos que atendían e que mesmo algúns chegaron a residir noutra vivenda.
Rocío Pidre tamén manifestaba que os maiores teñen moita paciencia e tamén moito "sentido do humor". En canto ao persoal indicaba que na residencia que xestiona foi necesario facer unha reestruturación para que o contacto fose mínimo coas persoas ingresadas e o persoal realizou un gran esforzo para evitar calquera situación de risco.
Pola súa banda, Lucía Saborido agradeceu o labor desde a xerencia da área sanitaria coa que mantiveron reunións para coordinar o traballo. En todo caso, as tres directoras lembraron que o temor continúa e é necesario que "se fagan as cousas ben".
No proceso de desescalada, as directoras dos tres centros indicaban que o réxime de visitas realizarase de maneira progresiva a partir da última semana de maio e tamén se comezará a permitir que os maiores que se atopan nos centros comecen a realizar paseos e a saír das instalacións.
Relacionadas:
-
Sanidade flexibiliza a desescalada en municipios de menos de 10.000 habitantes
Por Alejandro Espiño |
-
Montecelo rexistra un ingreso hospitalario por coronavirus, con 50 casos activos na área sanitaria
Por Diego Espiño |
-
Cuarto día consecutivo sen pacientes hospitalizados por coronavirus na área sanitaria, con 51 casos activos
Por Diego Espiño |
-
COVID-19: Unha enfermidade e outra barreira para persoas con diversidade sensorial
Por Marisa Ciordia |
-
Denuncian a "actitude ditatorial e tiránica" da dirección da Residencia de Maiores de Campolongo
Por Redacción |