O Consultorio de Ponte Sampaio reactivará a actividade de Enfermería o vindeiro 1 de xuño
Por Oskar Viéitez
Creada e actualizada
Creada e actualizada
A Área Sanitaria reactivará a partir do vindeiro luns 1 de xuño a actividade de Enfermaría de Atención Primaria no consultorio da parroquia pontevedresa de Ponte Sampaio.
Nun comunicado o Sergas sinala que esta área sanitaria está adaptándose de novo ás continxencias da pandemia polo COVID-19 e recuperando a planificación asistencial segundo as recomendacións das autoridades sanitarias.
Engaden que a atención sanitaria se ve modificada pola nova situación de presencia de coronavirus, circunstancia pola que o sistema sanitario público galego ten a obriga de garantir a seguridade tanto dos pacientes que acoden ao mesmo coma a dos profesionais que o atenden.
Polo tanto, o Sergas reitera que hai que rexirse polos actuais condicionantes preventivos do estado de alarma pautados polas Autoridades Sanitarias, que condicionan a total normalización da actividade de Atención Primaria no consultorio de Ponte Sampaio, "cuxa distribución de espazos non cumpre os requisitos mínimos para desenvolver a actividade asistencial sen minimizar riscos para pacientes e profesionais".
Neste senso, engaden que, "as características do consultorio non poden facilitar a habilitación de dobres circuitos, ou contar cunha sala de illamento nin dispor da posibilidade de efectuar triaxe á entrada de dito centro".
Dados estes condicionantes, a Área Sanitaria de Pontevedra e O Salnés mantén de xeito provisional o reagrupamento do persoal facultativo nun centro de referencia, "que se adapta con maior garantía á continxencia da Covid-19".
PLAN PROVISIONAL FLEXIBLE E REVERSIBLE
A Área Sanitaria de Pontevedra e O Salnés reitera que o seu plan de reanudación asistencial en Atención Primaria continúa a ser "provisional, flexible e reversible" en función da evolución da pandemia e sempre con garantías de seguridade para pacientes e profesionais en Ponte Sampaio.
Complementariamente, escalonaranse as citas para atención de Enfermaría de Atención Primaria, de xeito que se evite a acumulación de pacientes no consultorio, ao tempo que se manterá a distancia de seguridade durante a estadía dos usuarios.
Lémbrase tamén que os pacientes acudirán previa consulta telefónica co profesional e aconséllase acudir coa correspondente mascarilla cirúrxica. Estas iniciativas pretenden adaptarse á situación epidemiolóxica deste centro sanitario, dando mellor resposta ás súas necesidades.
REACCIÓN VECIÑAL
A Plataforma veciñal Ponte Sampaio-Canivouva aplaude a apertura do Centro médico de Ponte Sampaio logo da presión realizada pola veciñanza, que nun só día chegaron a recoller 610 sinaturas, a maior parte da poboación adulta que atende o consistorio, para reclamar esta reapertura.
Afirman que se manterán moi atentos a esta apertura anunciada ata coñecer en que condicións se pon en marcha, e seguen a reclamar o retorno do facultativo para completar unha atención que "nunca se debeu suspender".
Relacionadas:
-
Un biombo e unha porta permitirán adaptar o centro de saúde de Ponte Sampaio ao protocolo anti Covid-19 e recuperar a atención médica
Por Natalia Puga |
-
Ponte Sampaio concéntrase para reclamarlle ao Sergas o retorno do médico ao consultorio da parroquia
Por Diego Torrado & Redacción |
-
Ponte Sampaio sae á rúa para esixir o regreso do médico ao centro de saúde
Por Redacción |
-
O PP súmase á petición do Sergas e reclama ao Concello que ceda o edificio anexo ao consultorio de Ponte Sampaio
Por Redacción |
-
O Sergas só devolverá o médico ao consultorio de Ponte Sampaio se o Concello lle cede o edificio anexo
Por Redacción |
-
O BNG leva ao Parlamento Galego o peche do consultorio de Ponte Sampaio
Por Redacción |
-
Recollen máis de 600 sinaturas nun día para reclamar a apertura inmediata do consultorio médico de Ponte Sampaio
Por Redacción | Creada e actualizada
-
O Sergas non retomará a actividade no consultorio de Ponte Sampaio ata a fin da pandemia
Por Redacción |