Falece un pontevedrés de 88 anos cando nadaba na praia de Portomaior, en Bueu
Por Redacción
Un home de 88 anos de idade, veciño de Pontevedra, falecía este martes ao redor das 14.30 horas na praia de Portomaior, no municipio de Bueu.
Segundo a información facilitada polo servizo de Emerxencias do 112 Galicia, un particular chamaba a este centro solicitando axuda e asistencia para un home de avanzada idade que se sentiu indisposto mentres nadaba. As persoas que se atopaban na praia lograron sacalo da auga en estado de inconsciencia.
Desde o 112 Galicia trasladouse a alerta ao Servizo de Urxencias Sanitarias de Galicia do 061. Cando chegaron os efectivos sanitarios ata o areal só puideron confirmar o falecemento deste veciño de Pontevedra.
Axentes da Policía Local de Bueu, da Garda Civil e efectivos de Protección Civil da localidade foron avisados tamén do suceso.
Polo momento descoñécense as causas do pasamento desta persoa, segundo o 112.