Caballero impulsará as políticas sociais fronte os "recortes e inacción" de Núñez Feijóo
Pontevedra foi a parada que, na súa xira de precampaña, realizou este mércores o candidato do PSdeG-PSOE á presidencia da Xunta. Acompañado por Carmela Silva, Gonzalo Caballero elixiu a cidade do Lérez para falar de políticas sociais.
Tras o encontro que mantiveron ambos os dirixentes, Caballero lamentou que Núñez Feijóo "fracasara" na xestión das políticas sociais e que, ao longo desta crise sanitaria, non tomase "decisións importantes" para reforzar o estado de benestar.
O dirixente socialista censurou a falta de atención que, entre outros, tiveron as escolas infantís, as residencias de maiores, os centros educativos ou a dependencia.
Caballero defendeu que, "fronte aos recortes, o retroceso e a inacción" do goberno de Núñez Feijóo, o "bloque progresista" encabezado polo PSdeG-PSOE impulsará "claramente" un programa baseado na política social, a defensa da sanidade pública e a reconstrución económica "para que ninguén quede atrás".
As políticas progresistas son nestes momentos de crise sanitaria "máis necesarias que nunca", segundo Caballero, porque o PP "esqueceuse das persoas" e, neste sentido, "quen quedan máis atrasadas son as mulleres".
Por iso, o candidato socialista prometeu que se goberna tras as eleccións previstas para o 12 de xullo creará unha Consellería de Igualdade que teña "amplas competencias" para que as mulleres poidan saír "con garantías" da crise creada pola COVID-19.
Este departamento "específico" prevé garantir os dereitos das mulleres para desenvolver a súa actividade laboral e ter unha "vida digna" para conseguir "recuperar o país para a cidadanía e non agrandar a fenda de xénero" entre homes e mulleres.
Para saír da crise, engadiu o líder do PSdeG, "hai que priorizar ás persoas" e apostar polo estado de benestar a partir dun "gran pacto pola reconstrución" no que participen os partidos políticos, os axentes sociais e as administracións locais.
A este respecto, lamentou que Núñez Feijóo exercese de "observador" ante esta crise e non tomase "decisións nin medidas" para a cidadanía, fronte aos concellos ou as deputacións como a de Pontevedra que, ao seu xuízo, "deu un exemplo de como gobernar en tempos de crises".
Carmela Silva, pola súa banda, reivindicou o papel dos entes locais á hora de poñer encima da mesa "os recursos que de verdade chegan á xente".
Asegurou que, ao longo do estado de alarma "quedou claro" que fronte á "ausencia" da administración autonómica foron as deputacións e os concellos os que atenderon á cidadanía con problemas de alimentación, hixiene ou educativos.
Silva reclamou por todo iso que a Xunta aprobe un "fondo particular" dotado de 300 millóns de euros que permita ás entidades locais seguir cubrindo as necesidades da cidadanía cando finalice o estado de alarma.
Relacionadas:
-
Estiman que 15.000 fogares pontevedreses recibirán o ingreso mínimo vital
Por Alejandro Espiño & Mónica Patxot |
-
Paloma Castro insta á Xunta a "cumprir as súas competencias" e reabrir os centros de día
Por Redacción |
-
O BNG propón crear rutas seguras entre os concellos para ciclistas
Por Redacción |
-
A campaña do PSOE de cara o 12X terá presenza constante na rúa e acento nas políticas públicas
Por Redacción |
-
As residencias de maiores e centros de persoas con discapacidade reactívanse con cautela
Por Redacción |
-
Os socialistas esixen á Xunta un fondo de 300 millóns de euros para os concellos
Por Redacción |
-
Caballero promete desde Pontevedra gratuidade en escolas infantís e en primeiras matrículas en universidade
Por Redacción |