A fundación chinesa que visitou Pontevedra polo Plan Revitaliza doa material de protección á Deputación
Por Redacción
A fundación chinesa, Vanke Foundation, que visitou Pontevedra en outubro do 2019 para coñecer o funcionamento do Plan Revitaliza de compostaxe acaba de enviar á Deputación unha doazón de material de protección fronte ao coronavirus. O envío está composto por 2.800 máscaras de protección KN95, 2.000 pantallas faciais e 90 traxes de protección médica.
En todas as caixas dos dous palés de material recibido figuraba unha lenda coas bandeiras española e chinesa xunto ao texto "esperamos que estas pezas e máscaras protectoras axuden á vosa rexión na grave situación da Covid-19 neste momento. O amigo debe ser como o sangue, que acode á ferida sen esperar que a chamen".
A presidenta Carmela Silva e o vicepresidente César Mosquera manifestaron o seu agradecemento pola preocupación e esforzo por colaborar demostrado desde a fundación desde o momento no que a pandemia chegou a Pontevedra, así como o afectuoso escrito das caixas.
Mosquera quixo desvelar o continuo constante da secretaria xeral da entidade, Yimei Chen, co organismo desde o decreto do estado de alarma.
O 17 de marzo, chegou ao correo da Deputación a seguinte mensaxe: "Sentimos oir que a COVID-19 está a golpear España agora tamén. Nuesta visita a Pontevedra estivo chea de recordos marabillosos. Esperamos que vostedes, as súas familias e a súa comunidade estean seguros e sans. En nome da Vanke Foundation e os seus delegados gustaríanos facerlles chegar que vostedes están nos nosos pensamentos e oracións". Logo chegou o ofrecemento de material de protección que acaba de materializarse.
Tras a visita do mes de outubro enmarcada nunha xira por Europa dos representantes da fundación, Chen afirmou que "cando volvamos a China teremos que adaptar o que aprendemos aquí ás nosas circunstancias. Esperamos ver polo menos a parte dos que estades aquí algún día alí para que comprobedes como o estamos facendo".
Relacionadas:
-
Revitaliza ofrecerá actividades sobre compostaxe en obradoiros e campamentos de verán
Por Redacción |
-
A delegación chinesa aplaude que o Plan Revitaliza veña da man dunha administración pública e persoal experto
Por Oskar Viéitez |
-
"Ao volver a China adaptaremos o aprendido aquí do Plan Revitaliza ao noso contexto"
Por Oskar Viéitez & Cristina Saiz |
-
Unha delegación da China visitará Pontevedra para coñecer o Plan Revitaliza
Por Redacción |