Voto por correo e sen saír de casa, a novidade para as eleccións do 12 de xullo
Por María José Pita
As eleccións ao Parlamento de Galicia, fixadas para o próximo 12 de xullo, celebraranse no medio dunha situación excepcional. A pandemia do coronavirus obrigou a cambiar os protocolos do voto por correo.
Nun tempo no que a poboación está a limitar os seus movementos e a interacción social, poder votar sen saír de casa preséntase como a gran novidade para as eleccións autonómicas.
Desde este luns 8 de xuño e ata o 2 de xullo xa se pode realizar a solicitude de voto por correo, en oficina ou por vía telemática.
Para a solicitude en oficina, teremos que desprazarnos a unha sucursal de Correos para cubrir a solicitude (ou levala impresa, previa descarga do formulario na web do Instituto Nacional de Estatística) e despois esperar a que a Oficina do Censo Electoral nos remita ao enderezo indicado na solicitude a documentación para exercer o dereito ao voto.
En caso de non querer desprazarnos a unha oficina de Correos, a solicitude do voto por correo pódese realizar de modo telemático a través da web www.correos.es e mediante sinatura electrónica. A partir de aí, como no caso anterior, a Oficina do Censo Electoral debe aprobar a solicitude e a continuación remitila ao enderezo que indicamos na solicitude.
A partir do 22 de xuño realizarase a entrega da documentación electoral do voto por correo aos electores que así o solicitaron no domicilio que indicaron. O persoal de Correos comprobará a identidade do votante mediante o DNI, pasaporte ou permiso de conducir e anotará o número do documento identificativo dando fe da recepción dos sobres e papeletas, sen que sexa imprescindible que o elector asine a entrega.
VOTACIÓN DESDE CASA
Como novidade nestas próximas eleccións ao Parlamento de Galicia (e tamén ao vasco) é que, no momento de recibir no seu domicilio a documentación electoral, o elector, se o desexa, terá a opción de entregar ao carteiro os sobres electorais cumprimentados a cambio dun xustificante acreditativo do depósito do seu voto, evitándolle así ter que acudir posteriormente a unha oficina de Correos.
Esta entrega dos sobres electorais ao carteiro trátase dun servizo opcional. En todo caso, mantense o dereito do elector a non entregar o seu voto nese momento e facelo nunha oficina de Correos.
AMPLIACIÓN DO DEPÓSITO DO VOTO POR CORREO
No caso de que o elector deposite o seu voto nunha oficina de Correos, debe ter en conta os prazos legais establecidos. Debido ás circunstancias actuais, a Xunta Electoral Central acordaba ampliar o prazo para depositar o voto por correo nas oficinas de Correos ata o venres 10 de xullo, ás 14 horas.
Unha vez depositados os sobres electorais dos cidadáns que solicitaran exercer o seu dereito ao voto por correspondencia, Correos deberá asegurar a entrega destes sobres nas respectivas mesas electorais na xornada electoral do domingo 12 de xullo.
Desde Correos e Telégrafos lémbrase que unha vez presentada a solicitude de voto por correo, se é aceptada pola Oficina do Censo Electoral, o elector non poderá votar na mesa electoral o día da votación.
Relacionadas:
-
Simulacro das votacións en Marín: máscara obrigatoria, distancia de seguridade e cabinas sen cortinas
Por María José Pita |
-
Cambian de emprazamento tres colexios electorais de Poio para adaptarse ás medidas impostas pola Xunta
Por Redacción |
-
Correos amplía o seu horario en Pontevedra para facilitar o voto por correo
Por Redacción |
-
Así votaremos o próximo 12 de xullo
Por Redacción |