Cerdedo-Cotobade aproba novas medidas de seguridade para os locais abertos ao público
Por Redacción
Nunha reunión de coordinación cos representantes dos traballadores, o Concello de Cerdedo-Cotobade vén de acordar o reforzo inmediato de toda a seguridade sanitaria, con novas medidas de prevención, aforo e hixiene, nos servizos e dependencias municipais. Estas medidas estenderanse a todos os establecementos, negocios e actividades económicas abertos ao público.
En concreto, a atención no Rexistro Xeral e nos departamentos de Servizos Sociais, Medio Ambiente e Urbanismo, que son os máis empregados pola veciñanza, só se prestará con cita previa concertada telefonicamente nos números 986 760001 (Carballedo) e 986 753006 (Cerdedo).
A cita previa facilitará unhas condicións de aforo que permitan manter a seguridade tanto dos traballadores municipais como dos usuarios dos servizos. Polo tanto, en todas as instalacións manteranse os protocolos sanitarios con medidas de protección, hixiene e distancia social.
En canto aos establecementos comerciais, nestes días estanse distribuíndo novos materiais desinfectantes e de seguridade a todos os comercios e negocios do municipio para que as medidas adoptadas para as sedes administrativas se estendan a todo local que teña atención ao público, tamén os de carácter privado.
O alcalde, Jorge Cubela, manifestou que todas estas medidas sanitarias postas en marcha están orientadas a preservar a saúde de todos "xa que non se pode baixar a garda nin un chisco agora que mellorou a situación".
Polo demais, nesta xuntanza o rexedor tamén abordou cos servizos xurídicos e económicos a readaptación das bases de concesión das subvencións anuais a todos os colectivos de Cerdedo-Cotobade co obxectivo de atender as súas necesidades actuais e na adaptación á chamada nova normalidade.
Finalmente, pide aos departamentos municipais que procedan á máxima axilización de todos os expedientes de contratación pendentes, como a xestión da praia fluvial de Cerdedo, a licitación do Servizo de Axuda no Fogar (SAF), a adxudicación da senda peonil e humanización de Tenorio ou a Central de Compras Municipal, entre outros, para favorecer a reactivación e impulsar os servizos públicos "nun momento no que son máis necesarios ca nunca", afirma Cubela.
Relacionadas:
-
A Central de Compras de Cerdedo-Cotobade encara o seu cuarto ano cun orzamento de 250.000 euros
Por Redacción |
-
A Central de Compras de Cerdedo-Cotobade permite aforrar ao Concello un 18% en materiais
Por Redacción |
-
Cerdedo-Cotobade anuncia un Plan de Investimentos de 8,3 millóns de euros para a reactivación económica
Por Redacción |
-
Cerdedo-Cotobade unifica o seu servizo de axuda no fogar cun novo contrato de 788.000 euros
Por Redacción |
-
Os concellos da provincia contarán cun servizo de cita previa grazas á plataforma informática da Deputación
Por Redacción |