A veciñanza da Rúa Leandro del Río Carnota, unha vía que se atopa paralela nun tramo á estrada Nacional 550 e que é empregada por numerosas persoas para acceder ao centro de saúde situado na parroquia de Lérez, demandan do Concello de Pontevedra unha intervención inmediata para que limpen toda a contorna.

Un dos residentes nesta zona da cidade asegura que as silveiras ocupan parte da calzada por onde acceden aos seus domicilios e é imposible pasar “sen raiar o coche”.

Aseguran que toda a zona leva máis de ano e medio sen que os servizos municipais realicen unha limpeza en condicións, malia as demandas veciñais.

“É un encordio”, afirma un veciño que manifesta que esta situación tamén afecta a persoas que residen nas rúas Médico Ballina, Rúa da Torre e Barriga Verde. Quéixanse de que o Concello ten abandonado este punto da cidade e reclaman medidas para evitar que a vexetación e maleza continúen crecendo en determinadas leiras ou nos bordos das vías ata o punto de que dificulte o paso pola calzada.

O problema preocupa aínda máis despois do incendio que se producía este luns nunha leira da Gándara, outra zona da parroquia.