Esgotadas as prazas para inscribirse na ruta ornitolóxica pola Serra do Suído
Por Redacción
Xa se esgotaron as prazas para participar no quinto e último dos roteiros ornitolóxicos da terceira edición da campaña 'Voando nas Rías Baixas'. Trátase de camiñadas para avistamento de paxaros, organizadas pola Deputación de Pontevedra en colaboración con SÉ Birdlife.
Neste roteiro coñecerase tanto a riqueza ornitolóxica como paisaxística da Serra do Suído, a través dos Concellos da Lama, Fornelos e Covelo. Ofrécese un máximo de 15 prazas para a excursión guiada que é gratuíta e desenvolverase durante o domingo 6 de setembro.
A Serra do Suído é un sistema montañoso que contén un alto valor ecolóxico. Caracterízase pola presenza de exemplares de lobo ibérico e de aves rapaces, como o voitre leonado, o aguia calzada ou o miñato, que sobrevoan esta zona durante os meses da primavera e o verán.
Tamén se poden apreciar outras especies no espazo de monte baixo nesta paisaxe que conta con vales de gran beleza e cursos de auga que discorren entre bosques autóctonos ben conservados.