Veciños quéixanse de que a diario se xuntan ata 30 persoas sen distancias de seguridade nos accesos ao Provincial
Por Redacción
Veciños da rúa Joaquín Costa de Pontevedra queixáronse este xoves dunha situación de "descontrol" que aseguran que se vive nas inmediacións do Hospital Provincial nas tardes da última semana porque a diario reúnense, en horario de tarde, grupos de persoas que esperan para poder acceder á zona de consultas externas do centro hospitalario.
Segundo a información facilitada por estes veciños, cada tarde ás 16.00 horas xúntanse grupos de ata 30 persoas "hablando entre ellas y sin guardar distancia entre ellos". Aseguran que, de feito, "ni siquiera mantienen cola para entrar en el hospital".
PontevevedraViva realizou a comprobación e foi testemuña de pequenos grupos de persoas na porta, pero non de grupos tan elevados de ata 30 persoas. Comprobou, ademais, que o comportamento xeral é que estas persoas adoitan manter certa distancia e utilizar sempre máscara.
Estes mesmos veciños aseguran que as persoas que se reúnen ás portas do Provincial son os profesores citados para realizar os test rápidos e masivos ao persoal docente que desde a semana pasada está a realizar a Xunta no Provincial, Montecelo e o Hospital do Salnés e que chegan en "oleada".
"Los vecinos observamos atónitos que esto se repite día tras día", asegura unha veciña que critica que os docentes deberían dar "ejemplo" e gustaríalle que tomasen "conciencia" e "no se comportaran como los adolescentes que tanto se critican estos días".
Esta mesma veciña critica que a Policía Local "brilla pola súa ausencia".