Lores, "preocupado" ante a pandemia: "A impresión que teño é que non se están a facer os protocolos como din"
Por Alejandro Espiño
A pandemia non remite en Pontevedra. O número de casos activos por COVID-19 na cidade ascende xa a 296, trece máis que hai 24 horas. "Estou moi preocupado", recoñece o alcalde, Miguel Anxo Fernández Lores, que reitera que frear ao virus "é responsabilidade de todos".
"É un tema que hai que tomarse en serio", defendeu Fernández Lores, sobre todo ante o gran volume de asintomáticos que se están detectando e que poden poñer en risco a un sector de poboación máis vulnerable á infección.
O Concello, asegura o alcalde, colaborará coas autoridades sanitarias para tomar medidas contra o avance da COVID-19, pero reitera que "o virus está na xente", polo que pide aos cidadáns que extremen as precaucións porque "somos nós os que estendemos a pandemia aínda que non sexamos conscientes".
Iso si, tras este chamamento, Miguel Anxo Fernández Lores tamén mantivo as súas críticas ante a "escasa" información de Sanidade durante todo este proceso "porque nos dicían que había unha incidencia escasa e agora de súpeto hai brotes por todas partes".
"A impresión que teño é que non se están a facer os protocolos como din", sinalou Fernández Lores, que criticou que na Xunta "van un pouco de campións" e, entre outras medidas, "non se fan PCR a todo o mundo" para detectar a verdadeira incidencia do virus.
Ademais, aínda que espera que as medidas que se están tomando permitan "aplanar a curva", o rexedor pontevedrés lamenta que moitas dela sexan "parciais" e tomáronse con atraso ou que se mantivo o regreso ás aulas dos nenos.
"Enfrontarse a esta pandemia require sensatez, que non haxa demagoxia e que todos colaboremos", engadiu o alcalde, que aconsellou á Xunta que "non se adxudiquen medallas porque ao final veñen os rebrotes".
Para controlar o cumprimento das restricións, o Concello avanzou que a Policía Local priorizará dentro do seu traballo diario o seguimento de todas as cuestións relacionadas coa seguridade pública no medio desta pandemia.
Relacionadas:
-
Os hospitalizados por COVID-19 na área sanitaria ascenden a 22, cinco deles na UCI
Por Alejandro Espiño |
-
Dúas clases do colexio de Barcelos, en corentena por coronavirus
Por Redacción |
-
Marín reduce a participación de vendedores no mercado ambulante e Poio atrasa as sesións dun circo ante as medidas restritivas
Por Anxo Lourido |
-
Falece un home de 56 anos por Covid en Pontevedra e continúa a escalada de casos: 585 activos na área sanitaria
Por Redacción |
-
Sanidade impón restricións a Marín ante o incremento de casos de COVID-19
Por Alejandro Espiño |
-
Outros 29 positivos elevan a 577 os casos activos por COVID-19 na área sanitaria
Por Alejandro Espiño | Creada e actualizada
-
Pontevedra rexistra gromos "numerosos" de COVID-19 por reunións sociais e pacientes cada vez máis novos
Por Alejandro Espiño |