A Policía Nacional pon en marcha un dispositivo especial de vixilancia nos centros educativos de Pontevedra
Por Redacción
A Comisaría de Policía Nacional en Pontevedra deseñou un dispositivo especial de vixilancia que permita garantir o correcto funcionamento dos centros educativos con motivo do inicio do novo curso escolar e evite calquera problema de orde pública.
Segundo informou a Comisaría, este dispositivo púxose en marcha con motivo da apertura dos centros educativos e o inicio de curso escolar, e seguindo instrucións da Xefatura Superior de Galicia.
Durante todo o curso escolar, e de forma especial nos primeiros días de clase, as unidades de seguridade cidadá realizarán tarefas de vixilancia e os axentes da Delegación de Participación Cidadá poñerán en marcha actividades centradas en impartir consellos sobre o cumprimento das medidas de prevención sanitarias.
Ditas medidas están dirixidas tanto a alumnos como ao persoal docente de todos os centros educativos asignados á Comisaría de Pontevedra, do mesmo xeito que ás asociacións de pais e nais de alumnos vinculadas aos centros, iso si, sen obviar en ningún momento o propio labor formativo do Plan Director para a Convivencia e Mellora da Seguridade nos Centros Educativos e as súas Contornas.
Dentro das competencias propiamente ditas deste Plan Director para a convivencia nos centros escolares, as actividades para desenvolver son de contido eminentemente educativo e están enfocadas á prevención de accións negativas na contorna escolar, como a violencia de xénero entre adolescentes, ou o bullying ou acoso escolar nas diferentes etapas educativas, así como os riscos propios que implica o uso da internet, os delitos de odio, ou os perigos que xeran o consumo de drogas e alcol.
Todas as actividades e actuacións que leven a cabo en colexios e institutos da súa demarcación virán coordinadas desde a Comisaría de Pontevedra.
Relacionadas:
-
A Policía retoma a súa colaboración cos colexios sobre prevención do acoso escolar e uso das redes sociais
Por Redacción |
-
Os institutos volven á vida por quendas e moi ordeados para tentar evitar aglomeracións
Por Manu Otero & Mónica Patxot |
-
A Subdelegación do Goberno coordina un plan para previr a violencia machista e o acoso en centros escolares
Por Manu Otero |
-
15 escolares de Ponte Sampaio xa presumen de ser ciberexpert@s para moverse con seguridade nas redes
Por Victoria Regueira & Anxo Lourido |
-
A Policía, axudando a previr delitos desde 50 aulas pontevedresas en dous meses
Por Redacción |