A área sanitaria incorpora 46 residentes para hospitais e centros de atención primaria
Por Redacción
A Área Sanitaria de Pontevedra e O Salnés recibiu este xoves ao colectivo de 46 residentes que realizarán un período de formación de entre dous e cinco anos, dependendo da especialidade, en hospitais públicos e centros de atención primaria da comarca.
Dos novos residentes 15 especializaranse en medicina familiar e comunitaria, 23 farano como especialistas hospitalarios, 2 en enfermería obstétrico-xinecolóxica (matronas), 5 en enfermería familiar e comunitaria e 1 en enfermería pediátrica.
No seu primeiro día, sen o tradicional acto de despedida e recepción dos novos residentes polos condicionantes preventivos pola COVID-19, fíxoselles entrega dun dossier informativo e unha memoria USB complementaria.
Na actualidade a Área Sanitaria de Pontevedra e Salnés conta con acreditacións docentes para formar matronas, enfermeiras de familia, enfermería pediátrica, especialistas en medicina familiar e nun total de 21 especialidades hospitalarias: anestesioloxía e reanimación, cirurxía xeral, dermatoloxía, dixestivo, farmacia hospitalaria, hematoloxía, medicina interna, microbioloxía, obstetricia e xinecoloxía, oftalmoloxía, otorrinolaringoloxía, pediatría, psicoloxía clínica, psiquiatría, radiodiagnóstico, rehabilitación, cardioloxía, endocrinoloxía, reumatoloxía, uroloxía e traumatoloxía.