Avigal pechará 48 horas as súas instalacións en Cambados para desinfectar a fábrica
Por Oskar Viéitez
O protocolo preventivo COVID activo na Área Sanitaria de Pontevedra e o Salnés pola Consellería de Sanidade mantén en corentena a 75 traballadores da empresa Avigal dende o comezo do gromo e unha veintena de contactos destes traballadores, que evolucionan nos seus domicilios.
Segundo informa o Sergas, este protocolo xestiona a situación reforzando cribados preventivos na procura activa de detección de casos e mantendo o seguimento e control deste gromo.
En coordinación coa Administración Sanitaria Pública galega, a empresa Avícola de Galicia en Cambados pechará as súas instalacións 48 horas para intensificar a súa limpeza e desinfección, tanto en fábrica coma en zonas comúns, tras a detección de numerosos casos nos cribados realizados. Pechará o sábado 27 e o domingo 28 de setembro.
Esta nova medida adoptada pola empresa reforzará as implementadas dende o comezo do gromo para atallar as cadeas de contaxio, entre as que se atopan a redución da produción, o suministro de material de proteción aos traballadores e as limpezas e desinfeccións con produtos virucidas.
Dende Avícola de Galicia complementaron esta información engadindo que ao longo desta semana, a dirección da empresa "rebaixou de forma drástica a produción da planta de Cambados", que actualmente opera por baixo do 40%, "co obxectivo de intensificar o distanciamento social entre o persoal e reducir ao máximo o número de profesionais nas instalacións".
RESPOSTA Á CIG
A Administración Sanitaria Pública galega saen ao paso das denuncias do sindicato CIG que acusa á Xunta de "neglixencia" na xestión deste gromo de covid-19 xa que a central nacionalista dixo ter "indicios de que tanto a empresa como a Administración coñecían hai tempo a existencia de positivos, malia o que se continuou a traballar".
Dende a federación de Alimentación da CIG sosteñen que "o contaxio masivo en Avigal é consecuencia da permisividade e a falta de control coa que a Xunta favorece ás grandes empresas". Neste senso, pregúntase este sindicato se o Goberno galego "pretende facer en certas compañías o mesmo que fixo nas residencias de maiores, nas que censurou información sobre os contaxios".
Segundo a CIG, "tanto a empresa como a Xunta coñecían hai xa máis de 15 días a existencia de positivos por covid en Avigal, mais a actividade continuou".
A Administración Sanitaria Pública galega avala o actual protocolo preventivo en función das necesidades e rexeita as denuncias sindicais sobre neglixencia, "dado que a detección e rastrexo de casos COVID integra un permanente e eficaz traballo de equipo que aportan diversos profesionais do sistema".
Segundo o Sergas, "cando se produce un gromo en calquera lugar, todos datos COVID remítense ao sistema VIXIA de vixilancia epidemiolóxica, que xa está integrado no sistema de historia clínica, e que permite aos profesionais sanitarios que traballan no sistema de rastrexo coñecer a situación dos casos e a evolución das persoas do seu entorno".
Indica o Servizo Galego de Saúde que éste é un traballo de equipo da central de seguimento -que realiza as enquisas e o seguimento diario telefónico durante a corentena- dos técnicos de vixilancia epidemiolóxica, que fan seguimento de gromos coma o da empresa Avigal. Así mesmo, participa o persoal de Atención Primaria, que elabora a valoración clínica dos contactos que manifesten síntomas e fai o seguemento das persoas en domicilio.
O protocolo preventivo COVID conta tamén co persoal do servizo de Medicina Preventiva do Complexo Hospitalario Universitario de Pontevedra, que fai seguimento e control de positivos cando estes requiren hospitalización.
A Consellería de Sanidade lembra que "o protocolo preventivo COVID actívase cando clínica e epidemiolóxicamente así se require en calquera centro asistencial, empresarial ou educativo da comarca, respostando ás incidencias e en permanente coordinación cos servizos sanitarios e cos profesionais asistenciais".
Finalmente, engade que "coa operatividade destes protocolos, a porcentaxe de casos de coronavirus detectados en Galicia de persoas que non presentaban síntomas está a ser de arredor dun 66%, fronte á media nacional dun 53%. Este dato sitúa a Galicia como unha das tres comunidades autónomas españolas que detectan máis casos de COVID en persoas asintomáticas".
Relacionadas:
-
Os casos de covid-19 relacionados coa avícola de Cambados ascenden xa a 110
Por Redacción |
-
Pontevedra acumula 404 positivos, 22 máis que o venres
Por Almu Dapena | Creada e actualizada
-
Vilagarcía rexistra tres novos contaxios por covid e chega aos 60 positivos
Por Oskar Viéitez |
-
Continúa o avance de positivos na área sanitaria, que sumou 36 novos brotes desde que hai restricións
Por Natalia Puga |
-
Un brote nunha avícola de Cambados suma 96 positivos por Covid-19
Por Natalia Puga |