O PP critica ao Goberno local por pechar Raíña Vitoria "sen base técnica nin consenso"
Por Redacción
O concelleiro do Partido Popular de Pontevedra Pablo Fernández analizou este martes a decisión do Goberno local, BNG e PSOE, de non debater na Comisión de Mobilidade a proposta dos populares sobre o encargo dun estudo independente de tráfico e un plan de mobilidade sostible que analice a viabilidade do corte ao tráfico na rúa Reina Vitoria.
"Están a impoñer unha medida sen base técnica nin consenso. Alegan que non tiveron tempo para estudar unha petición anunciada a semana pasada e presentada hai máis de 24 horas por rexistro. Nós admitimos propostas do Goberno local presentadas cinco minutos antes da comisión", denunciou o popular.
Fernández lembrou que a formación á que pertence pedía a reapertura inmediata da rúa Raíña Vitoria "ata coñecer os resultados dos informes que solicitamos". "Que a rúa siga cortada sen un argumento sólido nin obxectivo sobre o peche é un insulto a todos os pontevedreses. Tómannos por parvos", esgrimiu o popular.
"A falta de implicación con este tema do BNG e do PSOE é a proba fidedigna de que ao Goberno local impórtalle pouco o que opinen os seus veciños, comerciantes, autónomos e empresarios, entre outros. Viven afastados da sociedade e están instalados en gobernar de maneira autoritaria. Quedou demostrado socialmente que a nosa oposición está secundada por unha maioría social", mantivo Fernández.
O concelleiro valorou "a marcha atrás" do concelleiro César Mosquera sobre a duración do corte: "Agora retráctanse e din que non é para sempre. Déronse conta tarde dunha metedura de pata garrafal. Pero o que a sociedade esixe é a reapertura inmediata".
Os populares, que continúan mantendo reunións con diferentes colectivos, comparten cos seus compañeiros do Partido Popular de Poio a preocupación pola imposición dun sentido na Ponte da Barca: "Van ter a todos no mesmo lado. Mantemos un diálogo fluído cos nosos compañeiros e traballamos na mesma liña".
Relacionadas:
-
Comerciantes, empresarios e oposición fan piña para reabrir Raíña Vitoria ao tráfico
Por Manu Otero |
-
Comerciantes de Raíña Vitoria trasladan ao Concello o seu rexeitamento ao corte ao tráfico da rúa
Por Redacción |
-
Fronte común do PP de Pontevedra e Poio contra o peche da rúa Reina Vitoria
Por Redacción |
-
O PP lamenta o "enorme prexuízo" que causan a centos de veciños de Poio os peches de vías de Pontevedra
Por Redacción |
-
Rafa Dominguez pide volver abrir Raíña Vitoria "mentres non se demostre que o corte é viable e factible"
Por Almu Dapena |