Desde hai anos, avoas de toda Galicia están a converterse en superheroínas. Xa o eran na vida real, pero agora tamén artisticamente. As "superavoas" creadas polo artista galego Yoseba Muruzábal forman parte xa da paisaxe urbana de quince localidades galegas.

Pontevedra contará moi pronto cunha destas "superavoas". A partir da próxima semana, se o tempo o permite, Yoseba Muruzábal comezará a pintar unha medianeira á beira do estadio de fútbol de Pasarón.

A súa protagonista será as estrañada Dolores Calviño, máis coñecida como a Señora Lola, toda unha institución no Pontevedra CF.

O mural estará dividido en dous partes. Reflectirá un retrato da Señora Lola a partir dunha fotografía facilitada pola súa familia e unha imaxe dela cos brazos levantados celebrando un gol. Esta última imaxe, do fotógrafo Miguel Vidal, forma parte do arquivo de Diario de Pontevedra, que a cedeu para esta homenaxe.

O artista explicou que este será para el un mural "diferente" a todos os que fixo ata o de agora porque será a primeira vez que inclúa un retrato da súa protagonista e, ademais, a superficie rugosa e ondulada da medianeira obrigaralle a traballar con outros materiais.

Será en branco e negro, como as fotografías orixinais, pero "metereille un toque de cor" a través dunha bengala de fume que a protagonista suxeitará coas súas mans.

"É para darlle o punto freak que lle dou a todos os meus murais, que lle dá un punto de humor", sinalou o autor do mural, que engadiu que "ao mellor despois engado algunha cousa máis. Aínda non sei. Irá sobre a marcha".

Para achegarse á figura da Señora Lola, segundo Muruzúbal, fixo unha investigación para buscar máis imaxes dela e profundar na historia e na vida da lavandeira do Pontevedra, unha das figuras de referencia neste club de fútbol.

Dentro deste traballo previo, o artista chegou a localizar a un sobriño-neto que se criou con ela, Toño, e á filla dunha sobriña que viven en Uruguai e que lle achegaron varios datos. "Contáronme a súa vida persoal, unha parte que non se coñece", detallou, información que formará parte do texto que acompañará ao mural.

O edil de Memoria histórica, Xaquín Moreda, explicou na presentación deste mural que esta iniciativa parte de dous programas municipais, A memoria das mulleres e o plan de mellora da paisaxe urbana.

Este mural contribuirá, segundo Moreda, ao obxectivo de "sacar á rúa a historia das mulleres da cidade" de Pontevedra e, ao mesmo tempo, embelecer unha medianeira que non se atopaba no mellor estado estético, sendo un exemplo de feísmo urbanístico na cidade.