Un home de 85 anos con patoloxías previas, vítima 22 do coronavirus na área sanitaria
Por Natalia Puga
Un home de 85 anos que estaba ingresado no Complexo Hospitalario Universitario de Pontevedra converteuse este luns na vítima número 22 da pandemia da covid-19 na área sanitaria de Pontevedra e O Salnés.
Segundo o último balance realizado pola Consellería de Sanidade, Galicia rexistrou este luns unha xornada negra con oito novas mortes de pacientes con coronavirus, o día con máis falecidos desta segunda onda da enfermidade. Desde maio non se rexistraban tantos falecementos na comunidade.
No caso da vítima pontevedresa, o home estaba ingresado no Hospital Montecelo e tiña patoloxías previas que complicaron a evolución da covid-19.
Na última semana rexistráronse en Pontevedra e O Salnés tres mortes por coronavirus. A última produciuse o pasado venres 2 de outubro, unha muller de 82 anos con patoloxías previas que estaba ingresada en Montecelo. Tres días antes, morrera outra muller de 89 anos.
Este luns 5 de outubro hai na área sanitaria, segundo o balance oficial realizada polo Sergas antes de coñecerse esta nova vítima mortal, 685 casos activos de coronavirus, dos que 663 evolucionan no seu domicilio e os 22 restantes estaban ingresados no Hospital Montecelo. A última hora da tarde, ese número reduciuse.
Segundo o balance facilitado ao mediodía, había 7 pacientes na unidade de Coidados Críticos do Hospital Montecelo e 15 ingresados en planta de hospitalización, 13 no Complexo Hospitalario Universitario de Pontevedra, 1 no Hospital QuirónSalud Miguel Domínguez Pontevedra e 1 no Hospital do Salnés.
Desde o domingo detectáronse 20 novos positivos por covid-19 na área sanitaria. Houbo nas últimas 24 horas 24 pacientes curados e 20 contagios, de modo que o número total de casos activos reduciuse en catro.
Desde o inicio do plan de continxencia da covid-19 curáronse 1.545 pacientes e faleceron por este virus na área sanitaria 22 pacientes.
En canto a realización de PCR’ s, nas últimas 24 horas realizáronse 1.225, que se engaden ás 46.705 xa efectuadas desde o inicio da pandemia-