Pontevedra devolverá case 224.000 euros aos contribuíntes polo canon do lixo
Por Alejandro Espiño
No recibo pola recollida de lixos do sexto bimestre, correspondente aos meses de novembro e decembro, todos os pontevedreses notarán unha pequena rebaixa. O Concello devolverá 223.739 euros pola bonificación do canon do lixo que se paga a Sogama.
O edil responsable de residuos, Raimundo González, explicou que Sogama, en virtude dunha orde publicada en xaneiro no Diario Oficial de Galicia, reduce un 10% o canon que pagan os concellos se estes repercuten esta rebaixa sobre os cidadáns.
No caso de Pontevedra, sinalou González, o goberno municipal abonará 6,90 euros menos por tonelada á entidade ambiental que xestiona os residuos en Galicia.
Esta regularización dos recibos supoñerá a devolución duns cinco euros por cada domicilio (que pagarán ese bimestre 17,18 euros en lugar dos 21,93 euros habituais) e de tres euros no caso do rural, onde non hai recollida diaria, que abonarán 9,45 euros e non os 12,06 euros que pagan cada dous meses.
A devolución é maior no caso de establecementos comerciais. No canto dos 41,87 euros nos que está fixada a taxa, terán que abonar 32,80 euros. É dicir, nove euros menos.
A aprobación desta bonificación xa non debe aprobarse no pleno municipal, xa que este delegou a tramitación deste asunto na comisión de Economía celebrada este martes.
Relacionadas:
-
Reclaman máis limpeza e unha mellor recollida de lixo en dúas rúas da cidade
Por Redacción |
-
A reciclaxe dispárase en Pontevedra, especialmente o papel e o cartón cun 50% máis
Por Alejandro Espiño |
-
Os concellos adscritos a Sogama reducen a produción de residuos e incrementan as taxas de reciclaxe da bolsa amarela
Por Noticia patrocinada |
-
O novo contrato do lixo oscilará entre os 11 e os 13 millóns de euros anuais
Por Alejandro Espiño |