12.500 pontevedreses participan nos programas municipais de compostaxe
Por Manu Otero
O Concello de Pontevedra ten instalada unha carpa na praza da Peregrina para informar os veciños sobre o Plan Composta, un programa de tratamento de residuos no que participan xa 12.500 pontevedreses do centro urbano e do rural. O concelleiro responsable do departamento de Residuos, Raimundo González, detallou este venres os niveis de participación en cada unha das modalidades do plan. "A compostaxe en Pontevedra vai a velocidade de cruceiro", asegurou.
O programa consta de tres partes. Por unha banda está a compostaxe individual que se está implantando nas parroquias do rural e do que se benefician actualmente unhas 7.000 persoas. Neste ámbito, o obxectivo do Concello é levar o programa ás sete parroquias que aínda faltan antes de final de ano. "Queremos retomalo, agora está parado pola covid porque non podemos facer visitas", explicou o edil. Esta modalidade consiste en instalar composteiros individuais nas hortas dos participantes, pero antes os técnicos percorren as parroquias para informar e formar aos interesados sobre como é o proceso.
As sete parroquias que aínda non o teñen implantado son Cerponzóns, Santa María de Xeve, Santo André de Xeve, Verducido, Ponte Sampaio, Lourizán e A Canicouva.
Doutra banda, na compostaxe comunitaria participan xa ao redor de 2.000 pontevedreses e o Concello está decidido a ampliar en oito centros de compostaxe adicionais a rede de 25 composteiros instalados xa en diferentes barrios do centro urbano pontevedrés. " Imos reforzar Campolongo e queremos instalar tamén outro no barrio do Burgo, estamos a buscar unha parcela axeitada", avanzou González.
O terceiro alicerce deste programa de xestión de residuos é o Plan Composta consistente na instalación dunha rede de contedores marróns nos que os veciños, previa inscrición e formación, poderán depositar o seu lixo orgánico. "Este aínda está a empezar", recoñeceu o concelleiro despois de revelar que xa contan con 1.400 fogares adheridos, o que supón unhas 3.500 persoas que despositan os seus residuos orgánicos nestes contedores que logo son trasladados a unha planta de compostaxe.
As consecuencias desta práctica xa se está facendo notar nos volumes de lixo enviados á planta de Sogama. En total produciuse no que vai de ano máis de 2.000 toneladas de compost, mentres que os envíos a Sogama nos nove primeiros meses do ano caeron en 1.200 toneladas con respecto ao 2019.
Relacionadas:
-
Pontevedra xa ten operativos 20 novos colectores de compostaxe
Por Redacción |
-
Trinta novas rúas súmanse ao Plan Composta para completar a 'Pontevedra compacta'
Por Alejandro Espiño |
-
Os 25 centros comunitarios completan a información de como compostar
Por Redacción |
-
Finalizou o período de participación veciñal para o deseño do tratamento dos residuos
Por Redacción |
-
Os contedores marróns recolleron máis de 275 toneladas de residuos orgánicos
Por Alejandro Espiño |
-
Reclaman máis limpeza e unha mellor recollida de lixo en dúas rúas da cidade
Por Redacción |
-
Recollen máis de 120 toneladas de residuos orgánicos a través do sistema de compostaxe domiciliaria
Por Redacción |
-
Uns 1.000 domicilios e establecementos de Pontevedra participan xa no programa Composta
Por Redacción |