Nace a "Alianza local polos 17 Obxectivos de Desenvolvemento Sostible"
Por Oskar Viéitez
A presidenta da Deputación de Pontevedra, Camela Silva, anunciou hoxe o lanzamento da iniciativa "Alianza local polos 17 Obxectivos de Desenvolvemento Sostible" coa que se promove o aliñamento dos 61 concellos da provincia co cumprimento dos Obxectivos de Desenvolvemento Sostible (ODS) que conforman a Axenda 2030 da ONU.
A partir de agora, a Deputación porá o foco cada mes nun dos 17 ODS con accións, proxectos e campañas de difusión.
O primeiro paso para a creación da Alianza Local consistirá no envío dunha carta aos concellos e a divulgación na web e no boletín informativo da Deputación das iniciativas municipais dos concellos que se adhiran como exemplo de boas prácticas.
Carmela Silva, acompañada pola deputada responsable de Transición Ecolóxica e Proxectos Europeos, Iria Lamas, adiantou que sumarse á Alianza Local significará tamén un maior financiamento para os municipios que dean o paso.
Ademais, comprometeuse a promover actividades como exposicións, concertos, andainas e accións no ámbito educativo e da igualdade para reforzar este gran pacto polo desenvolvemento sostible.
DÍAS MUNDIAIS DA ONU
A presidenta tamén adiantou que ao longo deste mes de outubro a Deputación vai celebrar 11 días mundiais evidenciando o vínculo das causas representadas nestas efemérides cos Obxectivos de Desenvolvemento Sostible.
Por exemplo no Día Internacional das Mulleres Rurais, a Deputación organizará en Pontevedra una xornada o día 28 de en colaboración con Fademur (Federación de Mulleres Rurais de Galicia). Levará por título “As mulleres e os efectos da covid-19 na Galicia rural” e consistirá nunha mesa redonda con relatoras, todas elas mulleres, dos sectores hortofrutícola, gandeiro, da educación pública e das entidades sociais.
En canto ao Día das Escritoras, celebrarase o día 19 en Vigo cunha lectura pública de textos de escritoras tomando como referencia o acto que celebra a Biblioteca Nacional nesta conmemoración baixo o comisariado da escritora Elvira Lindo.
A Deputación tamén celebrará actividades ao fío do Día Mundial da Alimentación (16 outubro); o 17, Día Internacional para a Erradicación da Pobreza; o 18 polo Día Mundial de Protección da Natureza; o 21, Día Mundial do Aforro de Enerxía; o 24, Día das Nacións Unidas, Día da Información sobre o Desenvolvemento e Día Internacional contra o Cambio Climático. Finalmente, poñerase en valor o día 31 ao fío do Día Mundial das Cidades.
Relacionadas:
-
A Deputación impulsará actividades para compensar as emisións de carbono
Por Redacción |
-
Carmela Silva e Ione Belarra sentan as bases para avanzar no cumprimento da Axenda 2030
Por Oskar Viéitez |
-
A Deputación de Pontevedra entra no Consello de Goberno da nova Rede Local para a Axenda 2030
Por Redacción |
-
A Deputación súmase ao Día Internacional das Mulleres Rurais
Por Cristina Saiz |
-
A Deputación, con 40 proxectos en marcha, cumpre coa Axenda Europea 2030 para un desenvolvemento sostible
Por Redacción |