Crean unha plataforma para reservar casas de turismo rural en toda Galicia
Por Redacción
Máis de 120 establecementos de turismo rural de toda Galicia uníronse para crear galiciaturismorural.es, unha plataforma conxunta de comercialización a través da cal os viaxeiros poden xestionar as súas propias reservas.
Esta plataforma, que foi creada coa colaboración da Xunta de Galicia e a Federación Galega de Turismo Rural (Fegatur), foi presentada este sábado na Estrada.
O vicepresidente do goberno galego, Alfonso Rueda, destacou a importancia desta ferramenta para "facilitar o contacto" dos turistas cos aloxamentos dunha forma "rápida e directa", o que axudará a aumentar a "competitividade" do sector.
Rueda celebrou que esta plataforma naza nesta época, xa que lembrou que o outono é unha "boa oportunidade" para dar "pulo" ao turismo rural en Galicia.
Este tipo de viaxes, defendeu o responsable de Turismo no goberno autonómico, teñen "valores propios" que se adaptan ao que buscan os turistas en plena pandemia, ao estar situados en espazos naturais e en lugares "pouco masificados".
A día de hoxe, a través desta plataforma xa se poden reservar máis de 120 establecementos rurais aínda que os seus responsables aseguraron que están "abertos" á adhesión de calquera dos preto de 540 aloxamentos deste tipo que hai en Galicia.
Esta plataforma de xestión do turismo rural galego, engadiu o vicepresidente da Xunta, contribúe a posicionar a Galicia como "destino seguro", como demostrou que o sector "resistise mellor" o verán que a media do resto do mercado nacional.