Un home de 87 anos ingresado no CHOP, vítima 29 da covid-19 na área sanitaria
Por Natalia Puga
Un home de 87 anos que estaba ingresado no Complexo Hospitalario Universitario de Pontevedra (CHOP) converteuse este martes na vítima número 29 da covid-19 na área sanitaria de Pontevedra e O Salnés.
Fontes oficiais da Consellería de Sanidade confirmaron este martes o falecemento en Galicia de dúas persoas que foran diagnosticadas por coronavirus, este home en Pontevedra e un home de 77 anos que estaba ingresado no CHUO de Ourense e procedía da residencia de maiores Vos Gozos de Pereiro de Aguiar.
Esta vítima 29 de Pontevedra tiña, segundo estas mesmas fontes, patoloxías previas.
Este martes a área sanitaria ten 727 casos activos de coronavirus, dos que 676 están en seguimento domiciliario e 51 no hospital, entre eles, este home que faleceu.
Segundo as cifras facilitadas pola mañá, había 42 pacientes ingresados en planta de hospitalización -36 no Complexo Hospitalario Universitario de Pontevedra, 2 no Hospital QuirónSalud Miguel Domínguez Pontevedra e 4 no Hospital do Salnés- e 9 pacientes na unidade de Coidados Críticos do Hospital Montecelo.
Desde o inicio do plan de continxencia da covid-19 curáronse 2.346 pacientes (23 deles na última xornada).
En canto a realización de PCR’ s, nas últimas 24 horas fixéronse 700, que se engaden ás 61.069 xa efectuadas desde o inicio da pandemia na área sanitaria de Pontevedra-O Salnés .
Relacionadas:
-
A área sanitaria alcanza os 30 falecidos por covid-19 tras morrer un paciente de 72 anos ingresado en Montecelo
Por Natalia Puga |
-
A área sanitaria supera o seu teito de casos activos de Covid, con 838
Por Diego Espiño |
-
A residencia de maiores de Ribadumia, intervida tras 25 contaxios da covid-19
Por Redacción |
-
Récord de contaxios por Covid na área sanitaria, con 82 novos positivos nun día
Por Diego Espiño |
-
Dous ingresos na UCI e 67 novos contaxios en área sanitaria, que volve superar a barreira dos 700 casos activos
Por Diego Espiño |