Esnaquizan un cruceiro en Madrid realizado por canteiros pontevedreses
Por María José Pita
A céntrica praza de Jacinto Benavente, en Madrid, albergaba ata esta fin de semana un cruceiro que simbolizaba a presenza de galegos na capital e un agradecemento á acollida desta cidade.
Este cruceiro era unha doazón realizada polo Centro Galego de Madrid, que ten a súa sede a escasos metros, a finais do pasado século.
Desde o Centro Galego, na súa páxina oficial, manifestaban o seu "pesar pola destrución do cruceiro da praza de Jacinto Benavente", que quedou completamente esnaquizado xa que só se conseguiu salvar a base.
"O Centro Galego de Madrid lamenta, profundamente, perder un símbolo, o noso cruceiro, que con todo o agarimo doaramos ao pobo de Madrid como mostra de irmandamento e que se atopaba situado na praza de Jacinto Benavente, praza que recolle algunhas das nosas actuacións por ser a máis próxima á sede máis antiga dos galegos na Comunidad de Madrid, sita na rúa Carretas, 14 3ª planta", engade a agrupación de galegos en Madrid.
O Centro Gallego facíase desta maneira eco da publicación en redes sociais por parte da asociación Madrid, Ciudadanía y Patrimonio (MCyP, Asociación en defensa do patrimonio histórico, artístico, cultural, social e natural da Comunidade de Madrid), na que denunciaba este acto vandálico que atribuía a uns individuos, supostamente baixo os efectos do alcol.
El vandalismo, sea por parte de personas o instituciones es INADMISIBLE, nos destruye como sociedad. Ayer unos individuos -presuntamente bajo efectos del alcohol- destruyeron el cruceiro de hermanamiento con Galicia en la plaza de Jacinto Benavente.@CulturaXunta @Madrid_Cultura pic.twitter.com/Z7QSZb3rBw
— MCyP / #QuédateEnCasa (@madridcyp) November 7, 2020
OBRA DA ANTIGA ESCOLA DE CANTEIROS DE PONTEVEDRA
O historiador e investigador Luís Miguel Aparisi achega no seu libro 'Testimonios gallegos en Madrid' a conexión deste cruceiro coa Escola de Cantería de Pontevedra: "Con fecha 20 de mayo de 1992, el Centro Gallego de Madrid ofrece a la Concejala Presidenta de la Junta Municipal de Centro donar este cruceiro. Trabajado por la Escuela de Canteros de Pontevedra".
Na publicación detalla que a súa primeira localización fora "en la zona ajardinada delante del edificio del Tesoro Público (entre las calles de Atocha y de la Bolsa)" e que nunha posterior remodelación da praza Jacinto Benavente foi trasladado a este lugar.
O Centro Galego en Madrid xa anuncia que fará todas as xestións necesarias para que "cando esta pandemia nolo permita, tentaremos facer todo o posible para que ese emblema poida erixirse, novamente, no lugar que cremos lle corresponde".
Relacionadas:
-
O cruceiro de Casas Novas estreará novo emprazamento nos próximos días
Por Redacción |
-
A Escola de Cantería consegue a acreditación como centro de formación para a expedición de certificados de profesionalidade
Por Redacción |
-
VÍDEO.- Un mestre canteiro formado en Poio é o gañador do Premio Driehaus das Artes da Construción
Por Redacción |
-
Os canteiros de Poio ofrecen os seus servizos para a restauración da Catedral de Notre Dame
Por Oskar Viéitez |
-
Repoñen os cruceiros de Mogos e A Chantiña para celebrar o miliario de Cerponzóns
Por Olaya Madrigal |