Os composteiros do Plan Revitaliza na Cañota e O Sequelo xa levan tratadas once toneladas de biorresiduos
Por Redacción
Os centros de compostaxe comunitaria de A Cañota e O Sequelo do Plan Revitaliza no concello de Marín, que comezaron a funcionar os meses de xullo e agosto, xa levan tratadas once toneladas de biorresiduos da veciñanza, correspondentes á fracción orgánica e a restos vexetais.
Para celebralo os mestres composteiros realizarán este xoves e venres un reparto de compost entre todas as persoas participantes na iniciativa.
Segundo o persoal técnico que leva o seguimento e control dos dous centros de compostaxe, ambos composteiros están funcionando de maneira moi positiva, cunha alta participación e con apenas impropios, é dicir, case sen aportes de lixo non orgánico.
Para amosar a calidade do compost, entregarase ás persoas que se acheguen o produto resultante de transformar os residuos orgánicos que saen de cada casa nun fertilizante para as plantas.
A xornada informativa e o reparto de compost realizarase o xoves en O Sequelo entre as 12 e as 14 horas, e o venres 27 no mesmo horario nas inmediacións do composteiro da Cañota.
Coa instalación destes dous centros de compostaxe comunitaria Marín incorporouse ao grupo dos chamados "Concellos Revitaliza", facendo que a totalidade dos municipios da comarca do Morrazo estean involucrados no plan provincial da Deputación. Nestes momentos, tanto o concello de Marín, como o de Cangas, Moaña e Bueu teñen xa un importante número de composteiros comunitarios e de composteiros individuais instalados.
A intención da Deputación e do Concello de Marín ao instalar o centro de compostaxe comunitaria é tratar no mesmo lugar no que se producen os biorresiduos de varias ducias de veciños e de produtores singulares de lixo, e así evitar que vaian ao colector verde tradicional, teñan que ser recollidos polo camión e transportados a Sogama para a súa incineración, co custe ambiental e económico que iso supón.
Relacionadas:
-
A Mancomunidade do Morrazo reduce un 3% o envío de residuos a Sogama
Por Redacción |
-
Piden unha campaña de sensibilización sobre a reciclaxe en Marín
Por Redacción |
-
Persoal do Plan Revitaliza traslada información á veciñanza sobre a compostaxe
Por Redacción |
-
A rexión de Bolama, en Guinea-Bisáu, replica o plan de compostaxe da Deputación
Por Oskar Viéitez |
-
O goberno de Marín estuda as fórmulas para reducir un 40% as emisións de gases de efecto invernadoiro
Por Redacción |
-
O composteiro do Sequelo entra en fase de repouso e habilítase un segundo caixón
Por Redacción |
-
Mostras de compost gratis para os veciños de O Sequelo e A Cañota de Marín que se acheguen aos centros de compostaxe
Por Redacción |
-
Activan a compostaxe comunitaria en Marín con dúas charlas de formación
Por Redacción |