Berro desconsolado de auxilio da hostalería en Pontevedra: "Estamos mortos"
Por Manu Otero & Mónica Patxot
Cacerolas, bombos, bucinas, bandexas, altofalantes, cadaleitos, ramos de flores e unha infinidade de utensilios para facer ruído portados por máis de catrocentas persoas ligadas ao gremio da hostalería de Pontevedra, Marín e Poio fixéronse oir e ver este luns polas rúas da capital da provincia para deixar claro, ante a sociedade e as administracións do Estado, que a hostalería se está morrendo.
Do mesmo xeito que o luns pasado e que seguirán facendo todos os luns ata final de ano mentres dure o peche do sector, a asociaciación de Hostaleiros Empresarios de Pontevedra (Hoempo), co apoio da plataforma de afectados pola covid-19 que aglutina a preto dun centenar de hostaleiros e autónomos de diversos sectores, organizaron unha multitudinaria marcha desde a delegación da Xunta ata a praza de España facendo paradas diante do Concello, Deputación e Subdelegación do Goberno para facerlles chegar o seu malestar e as súas reivindicacións.
"Queremos deixar claro que non somos o punto de contaxio", remarcou o presidente do colectivo de hostaleiros, Víctor Pampín, quen alerta sobre a situación límite que está a vivir o sector, pechado como consecuencia da segunda onda da covid-19. "A situacion é cada día máis crítica, os gastos empezan mañá de novo con novos impostos, taxas e alugueiros e se non podemos facturar a situacion agrávase mais", expón o empresario que reitera a súa petición de axuda aos diferentes gobernos en forma de exoneración de taxas municipais, axudas económicas, laborais e sanitarias, así como permisos para reabrir cumprindo sempre coas pertinentes medidas de seguridade para evitarcontaxios.
"Estamos á espera de que baixen os contaxios e do que decida Sanidade", sinala Pampín cuestionado sobre cando cre que poderá chegar o día da repaertura, nun momento no que aínda non se cumpriu o mes do decreto que obrigou a pechar os negocios de restauración naqueles municipios galegos nos que a incidencia do virus era alarmante. De feito, Pontevedra é unha das cidades que segue en máximo estado de alarma e o sector teme que o peche se poida prolongar varias semanas máis.
Entre os preto de 500 manifestantes estaba o chef estrela Michelin, Pepe Solla, que pediu ás administracións que escoiten as súas peticións e se dean conta de que quedou demostrado que nestes negocios a taxa de contaxio é moi reducida, explicou con medo a que o sector poida perderse a campaña de Nadal.
Ao longo da marcha, os protestantes realizaron paradas diante das sedes do Concello, Deputación e Subdelegación para ler un manifesto co que deixar claro que "a hostalería non é o problema". Insisten ademais en que eles contribuíron cos seus impostos e que "chegou o momento" de que as administracións lles presten a axuda que necesitan.
"Estamos mortos", exclamaron preto de medio milleiro de camareiros, repartidores, provedores, autónomos e pequenos empresarios tombados no chan de céntrica Praza de España pontevedresa. Están a tempo aínda de revivir, pero só se lles permiten traballar.
Relacionadas:
-
A provincia de Pontevedra pecha o nefasto 2020 con 73.130 persoas desempregadas
Por Redacción |
-
BNG e PSOE estudan "alternativas" á supresión de taxas para apoiar os hostaleiros
Por Alejandro Espiño |
-
As restricións horarias e de aforo fan inviable a reapertura da hostalería en Pontevedra
Por Manu Otero & Mónica Patxot |
-
A Xunta planea unha desescalada por fases para a hostalería que empezaría con aforos reducidos e apertura ata as 17 horas
Por Manu Otero |
-
División no pleno da Deputación polas axudas aos sectores estratéxicos máis afectados pola pandemia
Por Oskar Viéitez & Mónica Patxot |
-
APE Galicia e Hoempo suman esforzos para apoiar á hostalería e xa prevén moitos peches
Por Redacción |
-
A Xunta estima en máis de 5,8 millóns de euros as axudas que percibirán os 900 hostaleiros de Pontevedra, Marín e Poio
Por Oskar Viéitez |
-
VÍDEO.- Rogo desesperado da hostalería para reclamar a exención de taxas municipais
Por Redacción |