A Consellería de Emprego ten en marcha dez programas formativos na comarca do Salnés
Por Redacción
A delegada territorial da Xunta en Pontevedra, Luisa Piñeiro, puxo en valor este xoves a "forte aposta" do executivo autonómico pola formación e o traballo no Concello de Vilanova de Arousa tras a concesión de dous obradoiros de emprego, que se suman á decena de talleres deste tipo que levarán a cabo durante o próximo ano na zona cun investimento total de 3,8 millóns de euros.
A representante da Xunta estivo acompañada polo alcalde de Vilanova, Gonzalo Durán, durante a visita realizada ao obradoiro de para xóvenes Mar de Santiago, con motivo do seu primeiro mes de actividade. Os 16 participantes desempregados menores de 30 anos formaranse durante doce meses en Cociña e Restauración. Neste municipio comezará este mes outra iniciativa centrada na xardinería.
“Creo que a aposta da Xunta de Galicia pola formación e o emprego queda máis que demostrada en Vilanova e, en xeral, en toda a bisbarra do Salnés, que recibirá case 4 millóns de euros, a maior cantidade de toda a provincia de Pontevedra, para desenvolver dez iniciativas laborais, entre obradoiros e programas integrados, para favorecer a empregabilidade de case 300 persoas”, explicou Luisa Piñeiro.