Os solicitantes das axudas Supera20 cobrarán a partir da próxima semana
Por Alejandro Espiño
O goberno municipal aprobará a orde de pago das axudas Supera20 en cuestión de días polo que, salvo que xurdan imprevistos administrativos, os solicitantes destas subvencións poderán comezar a recibir o diñeiro a partir da próxima semana.
"Seremos a primeira administración que poñerá cartos líquidos nos petos dos afectados", asegurou a portavoz do executivo local, Anabel Gulías.
En total serán 166 os beneficiarios do plan Supera20, despois de que oito das once alegacións presentadas atendéranse e se lles concedera a subvención solicitada.
Con estas novas solicitudes aprobadas, a contía que se repartirá entre os afectados ascenderá aos 507.567,13 euros. Un de cada tres beneficiarios son hostaleiros.
Ao mesmo tempo, o Concello está a avanzar nos "últimos flecos" da nova convocatoria de axudas Supera21. Tras acordalas coa Plataforma de Afectados pola covid-19, o goberno municipal reuniuse este mércores con Zona Monumental.
Ambas partes chegaron a acordos sobre a subvención á dixitalización, de reformas e acondicionamentos de locais, de medidas de protección da covid-19, campañas publicitarias ou material de servizo a domicilio, incrementar os prazos de xustificación, incrementar o anticipo do pago ou sobre a cota de veladores.
A maiores acordaron a posibilidade de que os solicitantes se poidan presentar a varias convocatorias, que se poidan imputar gastos anteriores á publicación da convocatoria e que se realice unha campaña de dinamización das rúas da zona monumental, cando a pandemia o permita.
FLEXIBILIZAR AS ORDENANZAS FISCAIS
Anabel Gulías confirmou ademais a intención do goberno municipal de revisar as súas taxas fiscais para introducir medidas que permitan "flexibilizar" esta normativa e aplicar de forma "menos engorrosa" bonificacións ou exencións en circunstancias extraordinarias.
"Estudaremos fórmulas para que sexan menos ríxidas", avanzou Gulías, sempre que estes cambios normativos, engadiu, conten co aval técnico e con garantía legal.
Con respecto aos veladores, a portavoz municipal sinalou que, tendo en conta que se cobra anualmente, o diñeiro correspondente ao tempo que estiveron pechados polas restricións da pandemia descontarase no recibo correspondente a xuño de 2021.
Relacionadas:
-
O Concello reforza o persoal para a axilizar a xestión das axudas aos afectados pola covid-19
Por Oskar Viéitez |
-
Reunión do alcalde con representantes das axencias de viaxes para informar das axudas Supera21
Por Redacción |
-
As axudas Supera21 suavizarán os seus requisitos e poderán optar empresas con máis traballadores
Por Alejandro Espiño |
-
Os 160 beneficiarios do Plan Supera20 recibirán unha axuda media de 3.000 euros
Por Alejandro Espiño |
-
Pontevedra activará unha nova línea de axudas para sectores afectados pola covid-19
Por Alejandro Espiño |