Unha ducia de incendiarios actúa na zona de Pontevedra, segundo Anova
Por Oskar Viéitez
Segundo Anova "ao redor dunha ducia de incendiarios actúa na zona de Pontevedra", conformada ésta por 29 municipios que engloban as bisbarras de Pontevedra, Salnés, Arousa e O Morrazo.
O perfil destes incendiarios, segundo explicou Claudio Quintillán da Coordinadora Nacional de Anova, "a maioría dos puntos de inicio dos incendios corresponden a lugares de acceso para persoas coñecedoras da zona, polo tanto veciños do ámbito". "Ninguén do lugar denunciará ao seu veciño, tanto se sospeita del ou mesmo no caso de encontrarse o delincuente in fraganti", sinalou Claudio Quintillán. "Existe un silencio absoluto no rural constatado pola investigación". E engadiu que está comprobado que "se unha persoa allea a un núcleo rural pasa por alí andando ou co seu vehículo, entón si que se achegan datos".
Quintillán sinalou que o incendiario se refuxia nese coñecemento completo do terreo e "nun amparo social no seu ámbito. Teñen ademais todas as facilidades: abandono do rural, falta de productividade e posta en valor do territorio". A isto engádenlle as múltiples causas polas que actúa o incendiario "eliminación de matogueira, gandaría, caza, desavenencias, vinganzas, contratación de persoal, lindes, vandalismo, etc".
Anova presentou este martes nunha rolda de prensa en Pontevedra unha serie de medidas urxentes ante a "proliferación de incendios forestais" e as consecuencias que arrastran tanto a nivel económico como ecolóxico e social.
Claudio Quintillán explicou que esta serie de medidas de choque a aplicar "dende o próximo inverno" pasa pola aplicación de oficio por parte dos concellos de la Lei de Montes de Galicia no que representa a núcleos rurais, é dicir, as franxas de seguridade de 50 metros. E, tamén planificar dende os Distritos forestais actuacións dirixidas ao territorio para romper a continuidade actual das masas pirófitas e matogueiras.
"Coa intencionalidade actual non podemos ter centos de hectáreas contínuas de vexetación só interrompida parcialmente por infraestruturas cuxo ancho non responde á inflamabilidade do combustible", sinalou Quintillán.
Anova tamén propoñerá á Xunta a través de AGE a elaboración en paralelo coas medidas anteriores dun novo Plan para o Monte Galego "unha planificación a 50 anos, consensuada e inamovible" que determine o espazo que vai ter a consideración de monte dentro da ordenación territorial de Galicia.
Ademais instan á Xunta a que determine o mapa de usos derivados do monte, e a que teña unha atención especial aos montes veciñais en man común potenciándoos como referentes socio-económicos e culturais do rural.
Outras medidas urxentes solicitadas diríxense aos 750.000 propietarios particulares que hai en Galicia e que supoñen máis dun terzo do territorio, 1,2 millóns de hectáreas "e que actualmente son o maior foco de inicio dos incendios forestais, agás na zona norte" informando en colaboración coa Fegamp da situación na que se encontran os terreos e impulsando propostas que melloren o minifundismo.
Para este último obxectivo Anova propón medidas fiscais por ter a parcela perfectamente identificada "hai que desgravar os que coidan do territorio, nese caso o monte particular porque benefician a toda a sociedade".
E finalmente esixen "un equipo público profesionalizado, especializado e comarcalizado que poida atender as emerxencias ambientais".