O frío apodérase das Rías Baixas na primeira semana do ano
Por Cristina Saiz
As Rías Baixas comezarán o ano con temperaturas frías. Segundo as previsións do servizo de Meteogalicia, os ceos manteranse con nubes e claros ao comezo dos días pero ao final predominarán pouco nubrados ou despexados. O domingo e o luns pola tarde haberá precipitacións intermitentes que desaparecerán o martes.
A cota de neve comezará nos 600-700 metros e irá descendendo ata os 400-500 metros pola noite. As temperaturas mínimas experimentan un descenso situándose entre os 0-1 graos e a máxima situarase nos 9-10.
A tendencia para a primeira semana do ano será de tempo frío e seco con temperaturas moi baixas. Formaranse xeadas durante as madrugadas e os valores máximos non superarán os 10 graos na costa e os 5 no interior.
A partir do martes os ceos serán despexados e manteranse así ata o sábado, mentres que os ventos soprarán febles durante toda a semana.