Renfe establece transbordos por estrada para os viaxeiros de dous Alvia Pontevedra-Madrid debido á borrasca
Por Redacción
Renfe estableceu un Plan Alternativo de Transporte por estrada para os viaxeiros dalgúns servizos Madrid-Pontevedra e Pontevedra-Madrid, debido ás temperaturas extremas e a neve orixinadas polo temporal dos últimos días.
Este martes o Alvia que saíu de Madrid ás 18:25 horas con destino a Pontevedra (23:35) circulará ata Zamora. A partir de aquí os viaxeiros encamiñaranse aos seus destinos por estrada.
Mañá, mércores, os clientes do Alvia que ten a súa saída de Pontevedra ás 5:47 horas con destino a Madrid (11:04), viaxarán en autobuses desde as estacións de orixe ata Zamora, desde onde continuarán en tren a Madrid.
En función da evolución da situación meteorolóxica, esta circunstancia poderá repetirse en sucesivos días. Renfe manterá informados os viaxeiros.
MEDIDAS POSVENDA
Se as condicións de viaxe non se axustan ás necesidades dos viaxeiros, Renfe ofrécelles a posibilidade de anular os billetes sen custo. Igualmente, o cliente poderá cambiar o seu billete sen custo, se é para idéntica clase.
En ambos os casos, poderanse realizar ata o tempo establecido en cada canle de venda, coa necesaria anticipación para poder levar a cabo os procedementos internos correspondentes no sistema de venda.
No caso de realizar a viaxe con transbordo en autocar, os clientes terán dereito á devolución do 20% do importe do billete do traxecto afectado.
O reintegro ou o abono xerado producirase mediante o mesmo medio de pago previamente utilizado para a compra do título de transporte. En caso de atraso, se o viaxeiro opta por realizar a viaxe, será acumulable, no seu caso, a posible indemnización derivada do atraso á chegada, se procede.