Domínguez denuncia "amiguismo" en contratos do BNG e os nacionalistas acúsano de ter "pouca ética"
Por Alejandro Espiño
O Partido Popular denunciou este mércores unha serie de contratos "a dedo" e alleos a "todo concurso público" que o Concello de Pontevedra fixo con "familiares y afines" ao BNG. Esta actuación, segundo Rafa Domínguez, demostra o seu "clientelismo" e o seu "nepotismo".
"El BNG tiene poco cuidado con el dinero de todos los pontevedreses", sinalou Domínguez, que advertiu que os populares "no vamos a permitir" que este tipo de contratacións menores, que permite a lei, se utilicen "para favorecer a los suyos".
Entre os contratos denunciados polo PP atópanse acordos con entidades "intimamente relacionadas" co BNG como Galiza Nova ou a Fundación Galiza Sempre.
O líder dos populares lamenta que desde o goberno municipal de Pontevedra estea a "financiarse una rama política de un partido".
Ademais, Rafa Domínguez censurou que entre as actuacións das Festas de Verán, máis de 300 segundo o Concello, se contrataran tres grupos nos que actúan familiares de concelleiros do BNG, La casa de los ingleses e Onte e Hoxe, ou mesmo un edil, Maravallada.
"Es bochornoso. No disimulan a la hora de hacer contratos con sus amigos y compañeros de partido", sinalou o portavoz do PP en Pontevedra, que lamentou a "falta de ética" do á nacionalista do goberno municipal.
Aínda que recoñece que todos estes contratos son legais, Domínguez sinala que o problema "no es la cuantía en sí" senón a "ausencia de ética y moralidad" no uso do diñeiro público.
O BNG VE COMPORTAMENTOS " POUCO ÉTICOS" NO PP
A este respecto, a concelleira Carme da Silva asegurou que "quen demostra un comportamento pouco ético é o PP", xa que reiterou que estes contratos "son legais" e foron avalados polos técnicos municipais mediante procedementos "regrados".
Da Silva defendeu que durante o verán "se contratou a todo o mundo" para inxectar diñeiro nun sector cultural "que o estaba a pasar francamente mal" e priorizouse para iso a contratación de grupos de Pontevedra.
A edil explicou que os máis de 300 grupos e compañías contratadas fixeron un "esforzo enorme" por sobrevivir á crise xerada pola pandemia "e non se merecen este tipo de descualificacións" por parte do Partido Popular.
Ademais, avanzou que o Concello "fixo e vai seguir facendo" este tipo de contratacións para que estas agrupacións culturais "teñan unha posibilidade para non saír arruinadas da situación na que estamos".