Os xardíns da Uned estarán en mans do Concello a partir da vindeira semana
Por Redacción
O Concello e o Centro Asociado á Uned en Pontevedra asinarán esta vindeira semana o convenio que permitirá utilizar publicamente como parque urbano os xardíns do centro docente situado na urbanización de Monte Porreiro.
O acordo de colaboración, no que se establece unha cesión para uso mixto do espazo verde compatible co seu aproveitamento pola cidadanía e os estudantes, entrará en vigor dende a sinatura do mesmo (prevista para o venres 29 de xaneiro) e terá unha duración de catro anos, podendo prorrogarse, por acordo expreso das partes, ata un prazo máximo de catro anos adicionais.
En base a este convenio, a Uned tería a obriga de poñer os xardíns a disposición do Concello pola fórmula de cesión de uso e de xeito gratuíto; garantir o uso público e libre acceso dos xardíns coa condición de abrilos e pechalos conforme ao horario do centro, e garantir o acceso libre e permanente dos servizos do persoal municipal ao que corresponderá a seguridade, vixilancia, limpeza, mantemento e conservación, así como dos traballadores das empresas concesionarias ou contratistas que poidan ter asignadas ditas funcións.
Segundo explica o concelleiro de Desenvolvemento Sostible e Medio Natural, Iván Puentes, entre as obrigas do Concello atópanse as de redactar, aprobar e executar o proxecto de axardinamento mediante a dotación de crédito suficiente e axeitada nos orzamentos; e prestar a seguridade, vixilancia, limpeza, mantemento e conservación do parque, desenvolvendo labores como desbroce e plantación de arborado, xardinería, recuperación de pavimentos e camiños, dotación de mobiliario de lecer e infraestruturas, actividades lúdico-deportivas, recuperación de bens e sinalización de percorridos e elementos singulares.
"A nosa intención é que este proxecto de posta en valor e apertura do parque da Uned, que incluirá a creación dun novo acceso dende a rúa Italia e a conexión co espazo natural do Miradoiro, se poña en marcha nos vindeiros meses, unha vez que estean aprobados de xeito definitivo os orzamentos de 2021", subliña Puentes.
O edil do PSOE agradeceu a "absoluta disposición e dilixencia" do director da Uned, Víctor Manuel González, para facer realidade un proxecto que "mellorará de xeito substancial" a calidade de vida dos veciños de Monte Porreiro e o sostemento e conservación dos xardíns e das súas especies arbóreas, "entre as que se atopan algúns exemplares senlleiros de gran valor".
Asemade, indicou que, aos efectos da axeitada consecución dos obxectivos do convenio, constituirase unha comisión de seguimento integrada por dous representantes, un da Uned e outro do Concello de Pontevedra, sen prexuízo da asistencia (con voz e sen voto) doutras persoas que se consideren necesarias por calquera das dúas partes.
Relacionadas:
-
O Concello investirá máis de 150.000 euros nos xardíns da UNED
Por Oskar Viéitez & Mónica Patxot |
-
Pídenlle ao Concello recuperar os xardíns da Delegación de Sanidade
Por Redacción |
-
A UNED aprobará o martes a cesión dos seus xardíns ao Concello de Pontevedra
Por Redacción |
-
Últimos trámites para que os xardíns da Uned conten cunha nova entrada e estean abertos á veciñanza
Por Redacción |
-
Tallan acacias que xeraban situacións de perigo nos xardíns da UNED
Por Redacción |