Dous homes no Hospital do Salnés e outro en Montecelo elevan a 112 os falecementos por covid-19 na área sanitaria
Por Redacción
Tres novas vítimas súmanse ao número de falecidos na área sanitaria de Pontevedra e O Salnés desde que se comezaron a notificar os casos de mortes por covid-19 no inicio da pandemia.
Segundo os datos notificados este luns 1 de febreiro, tres homes perdían a vida na área sanitaria durante a xornada do sábado 30 de xaneiro. Trátase de dous pacientes, de 74 e 86 anos no Hospital do Salnés e un terceiro, de 92, no Hospital Montecelo de Pontevedra.
Con estas tres novas mortes, o número de persoas falecidas na área sanitaria ascende a 112 desde hai un ano, cando se tiña constancia do primeiro paciente por esta enfermidade en España e comezaba a preocupación entre as autoridades sanitarias.
A Consellería de Sanidade notificou a morte de 14 persoas en Galicia durante estes últimos días, ademais destes tres casos. O día 29 de xaneiro falecían dúas mulleres, unha de 89 anos no Hospital Álvaro Cunqueiro e outra de 71 anos no Complexo Hospitalario Universitario de Santiago.
O sábado 30 morrían catro persoas no Complexo Hospitalario Universitario de Ferrol, tres homes de 70, 76 e 96 anos, e unha muller de 70. Ademais, unha muller de 87 no Complexo Hospitalario de Ourense; un home da mesma idade no Complexo Hospitalario de Santiago; outro de 83 anos no Hospital Comarcal da Mariña e unha muller de 88 na Residencia Padre Rubinos da Coruña.
E respecto a este domingo notificábase só a morte dun home de 91 anos no Complexo Hospitalario Universitario de Ourense.
Todas estas persoas falecidas por covid-19 contaban, segundo o Servizo Galego de Saúde, con enfermidades previas.
En total, en Galicia desde o inicio da pandemia producíronse 1.775 decesos por culpa desta enfermidade.
Relacionadas:
-
Tres novos falecementos en Montecelo por covid, nunha xornada onde Sanidade notifica 40 mortes en Galicia
Por Redacción |
-
Os hospitais da área sanitaria de Pontevedra e O Salnés, "moi preto do abismo" pola covid-19
Por Alejandro Espiño |
-
Os hospitalizados por covid-19 crecen a 161, 31 na UCI, nunha xornada con 119 novos contaxios
Por Alejandro Espiño |
-
Ningún concello da área sanitaria pecha xaneiro cunha incidencia por baixo de 250
Por Alejandro Espiño |
-
Os positivos por covid-19 chegan ata os 2.455 e as hospitalizacións son xa 154, trinta delas na UCI
Por Alejandro Espiño |