Crean unha nova horta urbana nunha parcela municipal na rúa Ernesto Caballero
Por Redacción
Ata dezaseis bancais de madeira, duns catorce metros cadrados cada un, terá a nova horta urbana que se vai a habilitar nunha parcela de titularidade municipal situada na rúa Ernesto Caballero. Neste proxecto investiranse algo máis de 30.000 euros.
A empresa Feito Pontevedra xa comezou cos traballos para arrombar a parcela, que está entre a rúa Ernesto Caballero e as vías do ferrocarril (ao seu paso por José Malvar).
O proxecto contempla a colocación dun peche perimetral duns dous metros de altura e dun portón de entrada que estará pechado con chave, polo que só terán acceso os usuarios da horta. Tamén se instalará unha billa e un sistema automatizado de rego por goteo.
O edil de Desenvolvemento Sostible, Iván Puentes, explica que a finca carece de auga polo que esta intervención incluirá unha nova acometida que executará a compañía Viaqua.
Ademais de achegarse material para acadar un solo o máis plano posible, adecuaranse as zonas comúns e de paso mediante unha achega de zahorra e a compactación do pavimento.
O Concello subministrará ferramentas de uso agrícola para o emprego comunitario dos usuarios e colocará unha caseta para gardar o material de traballo e un cartel coas normas de utilización dos verxeis. Tamén haberá un composteiro para o tratamento dos residuos agrícolas.
As obras prolongaranse durante un prazo aproximado de dous meses e a concesión dos verxeis farase por orde da lista da agarda existente, segundo destaca o goberno municipal.
Esta nova horta ecolóxica urbana sumarase ás xa existentes actualmente en Monte Porreiro e na finca de Conde Bugallal, dotadas con case sesenta bancais en total.
Relacionadas:
-
Ernesto Caballero estrea unha nova horta urbana con dezanove bancais
Por Redacción |
-
Habilitan hortas escolares en dez centros educativos de Pontevedra
Por Redacción |
-
Verdura estragada e caracois, na volta a actividade das hortas urbanas
Por Redacción |
-
Empresarios de venda de produtos agrícolas: "A crise sanitaria coincidiu horrible, no peor momento"
Por Diego Torrado & Cristina Saiz & Anxo Lourido |