Os populares interpelarán ao alcalde no pleno polas "irregularidades da súa política contractual"
Por Oskar Viéitez
O alcalde de Pontevedra, Miguel Anxo Fernández Lores, informou este mércores dos contidos do pleno municipal previsto para o vindeiro luns 30 de setembro e no que será interpelado polo grupo do Partido Popular polas "irregularidades da súa política contractual".
Segundo detallou a concelleira do PP, María José Rodríguez, o alcalde "terá que atopar antes do vindeiro luns unha explicación razoable á longa sucesión de prórrogas de contratos subscritos irregularmente polo Concello de Pontevedra en relación coa prestación de determinados servizos por parte de empresas de notable envergadura".
En total, o PP detectou nos últimos meses varios exemplos de servizos prorrogados de xeito irregular polo rexedor de Pontevedra: á multinacional de capital hindú Elsamex, adxudicataria do mantemento e conservación de xardíns, a Eurolimp S.A. e Ferrovial e Servicios S.A., ambas compañías do grupo Ferrovial polos dous contratos de limpeza e mantemento técnico do Pazo de Cultura e o Recinto Feiral.
"O que estamos facendo é aforrar cartos ao Concello", comentou Fernández Lores adiantando a que será a súa resposta no Pleno.