Comezan na Lanzada os traballos do xeorradar cara o proxecto de musealización do xacemento
Por Redacción
Persoal dunha empresa especializada iniciou este martes no xacemento da Lanzada os traballos de xeorradar cuxos resultados se incorporarán ao proxecto de musealización impulsada polo Ministerio de Fomento e a Deputación de Pontevedra.
O obxectivo desta actuación técnica é definir na súa totalidade a planimetría axustada dos restos non visibles que puidesen existir no subsolo, a fin de evitar posibles afeccións e protexer o conxunto cara ao desenvolvemento da próxima musealización.
Os traballos contaron cunha fase preparatoria que se desenvolveu en coordinación co Concello de Sanxenxo para a delimitación da área e a limpeza da zona que engloba unha superficie de 16.000 metros cadrados na parte máis próxima á terra e ao redor da zona principal onde se fixeron antigas escavacións.
O xeorradar non só permitirá analizar e facer un abano das estruturas existentes como a necrópolis, a salazón ou o poboado, senón que axudará tamén a delimitar elementos que puideran non estar localizados.
Estase a facer unha prospección xeofísica de investigación para obter a maior precisión e calidade na descrición, delimitación e caracterización dos elementos arqueolóxicos do xacemento e tamén unha prospección magnética coa que se poderán contextualizar aspectos concretos do xacemento, localizar e delimitar elementos como estruturas de combustión, niveis de destrución o estruturas defensivas.
Este traballo prolongarase ata o xoves e conta coa autorización de Patrimonio da Xunta e da comunidade de montes de Noalla. Os resultados incorporaranse con carácter divulgativo ao programa de musealización. O proxecto xa está redactado e atópase na fase de corrección para ser remitido á Dirección Xeral de Patrimonio.
A técnica do xeorradar se vén utilizando con excelentes resultados noutras zonas da provincia como é o caso de ata seis castros da zona do Deza, entre eles o de Toiriz en Silleda. Tamén está previsto desenvolver actuacións similares nos xacementos de Montaz en Silleda, e no Castriño de Bendoiro, en Lalín, castros enmarcados no convenio da Deputación de Pontevedra e o Consejo Superior de Investigaciones Científicas (CSIC).
Relacionadas:
-
Denuncian que o xacemento arqueolóxico da Lanzada está abandonado e "parcialmente derruído"
Por Redacción |
-
A singularidade arqueolóxica e antropolóxica da necrópole da Lanzada ve a luz grazas a unha investigación universitaria
Por Redacción |
-
A posta en valor da torre e o xacemento da Lanzada, proposta aos fondos europeos Next Generation
Por Redacción |
-
Novos estudos demostran que o xacemento da Lanzada é do tamaño da praia de Silgar
Por Redacción |
-
A exploración no xacemento da Lanzada retomarase a semana que vén
Por Redacción |
-
Xa están abertos ao público os tres primeiros castros musealizados pola Deputación e o Ministerio
Por Oskar Viéitez |
-
Os traballos no xacemento de Castrolandín comezarán a próxima semana
Por Redacción |