Aproban o primeiro PXOM de Portas
Por Redacción
A conselleira de Medio Ambiente, Territorio e Vivenda, Ángeles Vázquez, asinou este luns na casa do concello a orde pola que se constata a aprobación definitiva do primeiro Plan Xeral de Ordenación Municipal (PXOM) do Concello de Portas, que converte a este municipio no número 111 en Galicia en dispor deste instrumento adaptado e acorde á normativa urbanística vixente.
Grazas a esta ferramenta permitirase a concreción urbanística deste municipio e das súas previsións, ao tempo que é unha garantía para o desenvolvemento responsable, sostible e equilibrado do concello durante as próximas dúas décadas, ata o 2041.
Segundo manifestou a conselleira, "hoxe recóllense os froitos dunha tramitación que comezou hai xa 12 anos", ao tempo que se acada un plan xeral que é "o resultado do traballo, do esforzo e da implicación de moitas persoas". Ademais, engadiu que é a folla de ruta do futuro de Portas e beneficia a máis de 3.000 habitantes distribuídos nas catro parroquias existentes: Briallos, Portas, Lantaño e Romai.
Nesta liña, Vázquez recordou que redactar este PXOM supuxo estudar en detalle os case 23 quilómetros cadrados da superficie do termo municipal, polo que se pode afirmar que preto dun 84% do territorio de Portas é solo rústico, seguido xa a moita distancia polo solo de núcleo rural (un 15%).
Indicou que un PXOM ordena, como é no caso do núcleo da Estación grazas ao desenvolvemento deste solo urbano; e tamén fixa os posibles e futuros novos desenvolvementos, como o ámbito que acollerá un novo solo industrial para fortalecer este núcleo reitor do concello, marcado pola súa boa accesibilidade.
En termos socioeconómicos, este plan xeral tradúcese na creación de solo terciario e industrial, para dar un pulo ás actividades industriais e de servizos en Portas e co que permitir a implantación de accións innovadoras no solo urbano, a diversificación produtiva do medio rural e a potenciación dos valores ambientais e paisaxísticos do termo municipal.
Outras superficies que recolle o plan xeral e que destacan son os máis de 45.000 metros cadrados para espazos libres e zonas verdes e os máis de 100.000 metros cadrados para equipamentos comunitarios.