A metade dos mozos de Cerdedo-Cotobade non acudiron ao cribado masivo para detectar covid-19
Por Redacción
Un total de 668 mozos de 20 a 39 anos de Cerdedo-Cotobade estaban citados este mércores 12 de maio a un cribado masivo voluntario para detectar pacientes asintomáticos con covid-19. A metade deles non se presentaron ás probas.
Segundo o balance oficial realizado polo Servizo Galego de Saúde este xoves, en total realizáronse 334 probas, o 50% das convocadas, e detectouse un único positivo. Desta forma, segundo os datos achegados, deron positivo o 0,30% dos test realizados.
Entre as persoas desa franxa de idade que si acudiron á convocatoria estaba o alcalde de Cerdedo-Cotobade, Jorge Cubela.
A área sanitaria de Pontevedra e O Salnés tamén realizou nos últimos días dous cribados nos centros educativos CEIP San Xoan Bautista e CEIP Carballedo.
En ambos os cribados non se detectou ningún positivo por coronavirus. En total, realizáronse 76 probas en Carballedo de 89 alumnos convocados e 48 en San Xoán Bautista entre un total de 60 escolares citados para a proba.