Aprobado en pleno o estudo para favorecer a circulación de camións cara o futuro centro loxístico de Froiz
Por Redacción
A corporación municipal de Barro aprobaba no pleno celebrado durante a noite deste mércores a tramitación da solicitude para elaborar un Estudo de detalle presentado pola empresa Distribuciones Froiz para continuar coa construción do seu central loxística no Polígono de Outeda-Curro.
Este estudo céntrase en favorecer a circulación dos camións e facilitar as manobras de carga e descarga destes vehículos axustando as aliñacións da futura construción no polígono empresarial.
Ademais, na sesión plenaria, aprobábanse as bases para as axudas aos sectores máis afectados pola crise sanitaria e que se viron na obriga de pechar as súas portas debido ás medidas adoptadas polas distintas administracións. As axudas serán de 600 euros por establecemento e irán destinadas a aquelas entidades que careceron de actividade durante un mínimo de dous meses. O Concello de Barro destinará 25.000 euros, o 1% do seu orzamento, a estas axudas que se completan con 10.700 que achegará a Deputación de Pontevedra. As bases foron aprobadas cos seis votos a favor do BNG e un do PSOE, mentres que o PP votou en contra.
Tamén se aprobou a alegación á exposición ao público do proxecto sectorial para a construción do Parque eólico Acibal. Este proxecto contempla construír catro aeroxeradores no monte Acibal. A alegación do pleno establécese sobre os danos e prexuízos que este Parque eólico podería ocasionar na natureza se finalmente autorízase a construción, a pesar de que a localización destes elementos sería no Concello de Moraña, no punto límite co municipio de Barro.
Segundo alegan desde o Concello, o proxecto de execución estuda actuacións en vías de Barro modificando e ampliando o seu trazado. Estas obras poderían afectar, segundo o goberno, ao principal punto de captación de auga para a rede de abastecemento público, ao proceder dunha balsa situada na parte alta do monte Acibal.
O acceso ao Parque sería a través da N-550 mediante vías locais. Segundo o goberno local nin a vía que atravesa o núcleo de Santo Antoniño nin o que percorre por chan rústico ata Moraña están pensados para a circulación deste tipo de vehículos. Tamén se alega que os planos achegados ao Concello están incompletos.
Os aeroxeradores previstos no proxecto contan con máis de 100 metros de altura. A súa construción, segundo entende o goberno municipal, afectaría a paisaxe nun monte emblemático. A alegación foi apoiada polo BNG e polo PSOE, mentres que o PP votou en contra
Relacionadas:
-
Barro concede a licenza de construción a Froiz para construír o seu centro loxísitico
Por Redacción |
-
O talento feminino copa o programa de apoio ao emprendemento rural nos viveiros da Deputación
Por Redacción |
-
Froiz e EDF Solar formalizan a adquisición dos terreos no Polígono de Barro
Por Redacción |
-
Barro concede licencia de primeira ocupación para a nave de conxelados de Froiz
Por Redacción |