Pontevedra sumará este ano dez novas pistas á súa rede de campos de petanca
Por Alejandro Espiño
Ata unha decena de novos campos de petanca vai habilitar o Concello de Pontevedra por todo o municipio para completar a rede xa despregada polos barrios e parroquias. Os novos terreos serán acondicionados cunha achega de case 122.000 euros.
Crearanse dúas novas pistas de petanca en Monte Porreiro, nas inmediacións da igrexa; dúas en Ponte Sampaio, en Acevedo e A Ballota (zona próxima ao río Verdugo); unha no barrio de Pontevedra Leste; unha en Marcón; unha en Salcedo e outra en Estribela.
Ademais, en función das opcións da parcela, a previsión de facer outra máis en Mourente.
O edil de Deportes, Tino Fernández, prevé que todos estes campos estean rematados e listos para a práctica da petanca e da chave antes de que remate este ano.
Fernández asegura que a petanca é unha disciplina "á alza" que, ano tras ano, vai aumentando o número de xogadores en todo o municipio "a pesar de que voceiros doutros partidos a queiran menosprezar", como demostra a existencia dunha liga municipal de petanca.
De aí que o concelleiro socialista avance que "imos seguir contribuíndo ao seu crecemento con novas infraestruturas e co mantemento das xa existentes en perfectas condicións".
Pontevedra conta nestes momentos con quince pistas preparadas para albergar xogos de petanca e chave en Monte Porreiro (2), Mourente (2), Santa María de Xeve (2), Santo André de Xeve (1), Verducido (1), Salcedo (1), Bora (2), Centro Sur (2) e os xardíns da Deputación (2).
Hai outras tres xa en execución no barrio do Burgo, detrás do Pavillón Municipal.
Os labores preparatorios dos terreos fanse cunha limpeza con máquina retroescavadora, a apertura de "caixas" para a creación dos pavimentos e a eliminación de vexetación.
O pavimento destes parques realízase con terrizo de dez centímetros de espesor e con xabre e, entre outras actuacións, habilítanse sendas na contorna das pistas para mellorar a comunicación e a accesibilidade, plántase céspede na zona e instálase mobiliario urbano.
Relacionadas:
-
O barrio do Burgo xa conta con dúas pistas de petanca e zonas de sombra e descanso
Por Redacción & Mónica Patxot |
-
O Concello mellora o proxecto do parque do barrio do Burgo e retoma as obras
Por Redacción |
-
Acondicionan as pistas de petanca e chave do Centro Sur de Campolongo
Por Redacción |
-
Acondiciónase a parcela situada detrás do Pavillón para acoller un novo parque con dúas pistas de petanca
Por Redacción |
-
Os petanqueiros invaden a Alameda de Pontevedra por unha tarde
Por Redacción & Diego Torrado |